Үөрэнээччилэри наркотикка бэрэбиэркэлиэхтэрэ

Өрөспүүбүлүкэтээҕи наркологическай диспансер кулун тутар ыйга үөрэнээччилэри наркотикка бэрэбиэркэлээһин иккис түһүмэҕин ыытыаҕа диэн иһитиннэрэр диспансер пресс-сулууспата.

Быйыл Дьокуускай куорат 48 оскуолатын 13 сааһыттан үөһэ үөрэнээччилэрин бэрэбиэркэлээһин былааннанар. Бэрэбиэркэ сүрүн усулуобуйата – баҕа өттүнэн тестээһин уонна информацияны кистэлэҥҥэ тутуу. Түмүк дааннайдары үөрэнээччи бэйэтэ эрэ билиэхтээх. Наркотигы туттааччы баара билиннэҕинэ наркологтары уонна психологтары кытта үлэлэһэр туһунан этии киириэҕэ.

«Оҕо бэрэбиэркэни ааспыт түмүгүттэн тутулуга суох диспансернай учуокка туруоруллубат, инники олоҕор тестээһин туох даҕаны оруолу оонньообот.  Медицинскэй көрүү-истии соруга – накаастабыл буолбатах, наркотиктартан харыстыыр, тохтотор аналлаах», - диир Өрөспүүбүлүкэтээҕи наркологическай диспансер сэрэтэр үлэҕэ кэбиниэтин психиатр-нарколог бырааһа Надежда Хоютанова.

Оҕо 15 сааһын туола илик буоллаҕына, тестээһин төрөппүттэрин эбэтэр эппиэкэҕэ илдьэ сылдьар дьонун көҥүллэринэн оҥоһуллар, оттон 15 сааһыттан үөһэ үөрэнээччилэр – бэйэлэрэ быһаараллар.