Үөрэх үлэһиттэрин атырдьах ыйынааҕы мунньахтара саҕаланна

Быйылгы бырагыраама уопсайа биэс хайысханан 101 тэрээһини түмэр. Сүрүн тиэмэнэн үөрэх-иитии хаамыытыгар доруобуйаны харыстыыр технологиялары киллэрии буолар. Холобур, 2024 сылга биир сүрүн соругунан Саха сирин экономикатыгар каадырдары бэлэмнээһин буолбута. Оттон былырыын учууталларга уонна салайар каадырдарга сыыппара технологиятын сайыннарыыга, үөрэх эйгэтигэр оҥоһуу өйү туһаныыга ураты болҕомто ууруллубута.

Быйылгы тиэмэ чэрчитинэн үөрэх үлэһиттэрин доруобуйаларын, көхтөөх буолууларын, чөл аһылыктарын, кэлэктииптэригэр уйулҕа килиимэтин уонна ыарыылары сэрэтии боппуруостарын көрүөхтэрэ. Кыттыылаахтарга билим чинчийиилэрин, методическай оҥоһуктары уонна бастыҥ уопуту билиһиннэриэхтэрэ. Холобур, бэҕэһээ боксер Василий Егоров, Дыгын оонньуутун кыайыылааҕа Артем Дьяконов тренерэ Николай Иванов, Дыгын оонньууларын биир бастыҥ кыттааччыта Николай Матаннанов тус уопуттарын кэпсээбиттэрэ.

Атырдьах ыйынааҕы мунньахха сонун сүүрээн – MAX мессенджерга цифровой көмөлөһөөччү баар буолла. Кини көмөтүнэн кыттыылаахтар сылдьар былаһааккаларын былаанын оҥостуохтара уонна ааспыт тэрээһиннэри сыаналыахтара.

Мунньахха Үөрэх уонна билим министиэристибэтин тэрилтэлэрэ, регионнааҕы кииннэр уонна сайдыы институттара кытталлар. Атын регионнартан уонна федеральнай кииннэртэн 15 ыҥырыылаах эксперт, РФ Үөрэҕириитин министиэристибэтин бэрэстэбиитэллэрэ кытталлара күүтүллэр.