Үөрэххэ туттарсыы итии-буһуу күннэрэ саҕаланнылар

2026 с. абитуриеннара ХИФУ-га киирэргэ докумуоннарын, ыраахтан олорон (дистанционно) туттарар түгэннэригэр «Госуслуги» портал нөҥүө эрэ, «Вузка киирии» суперсервиһинэн онлайн биэриэхтэрин сөп. Урукку курдук үөрэх кыһата бэйэтэ туппат. Сирэй тиийэн туттарыы, биллэн турар, баар.

Ону таһынан, университекка «Биир түннүк» докумуону тутар пуун, институттар уонна факультеттар Сүүмэрдиир хамыыһыйалара, call-киин уонна киирии боппуруостарыгар сүбэ-ама биэрэр пууннар үлэлиэхтэрэ.

Быйыл, 2026–2027 үөрэх дьылыгар, ХИФУ-га барыта холбоон, 4120 бюджет миэстэтэ көрүллүбүт: бакалавриакка уонна специалитекка — 3765, орто анал үөрэххэ — 300.

2026 с. абитуриеннара ХИФУ-га киирэргэ докумуоннарын, ыраахтан олорон (дистанционно) туттарар түгэннэригэр «Госуслуги» портал нөҥүө эрэ, «Вузка киирии» суперсервиһин туһанан, онлайн биэриэхтэрин сөп. Урукку курдук үөрэх кыһата бэйэтэ туппат. Сирэй тиийэн туттарыы, биллэн турар, баар.

Ону таһынан, университекка «Биир түннүк» докумуону тутар пуун, институттар уонна факультеттар Сүүмэрдиир хамыыһыйалара, call-киин уонна киирии боппуруостарыгар сүбэ-ама биэрэр пууннар үлэлиэхтэрэ.

«Биир түннүк» диэн тугуй уонна туохха көмөлөһүөн сөбүй?

«Биир түннүк» үрдүк үөрэххэ туттарсар абитуриеннарга бастакы сүбэни биэрэр, докумуоннары тутар, киирээччилэри үөрэх бырагыраамаларын бэрэстэбиитэллэрин кытта көрсүһүннэрэр.

Онон докумуоннары тус бэйэҥ тиийэн  (очно) туттарар буоллаххына, бакалавриат, специалитет уонна магистратура бырагыраамаларыгар «Биир түннүккэ», ол эбэтэр, Кулаковскай уул., 42, ГУК, 2 этээһигэр, бибилэтиэкэҕэ (хаҥас диэки) тиийэҕин.

Онно кэллэххинэ, эйиэхэ докумуону хайдах толорору, сайабылыанньаны  сөпкө суруйары, үөрэххэ туттарсааччы Тус кабинетын хайдах астары, салгыы тугу гыныахха наадатын, докумуоннары хаһааҥҥы диэри туталларын уо.д.а. саас-сааһынан быһааран, ыйан-кэрдэн биэриэхтэрэ.  Өскөтүн ыйытыы эбии бэрэбиэркэни, чопчулаһыыны ирдиир, профильнай исписэлиис боломуочуйатыгар сыһыаннаах түгэнигэр эпэрээтэр ол ыйытыгы ылар, бэлиэтиир уонна үөрэххэ туттарсааччыны туһааннаах салааҕа ыытар. Эпэрээтэр абитуриеҥҥа сэргиир идэтин, үөрэҕин көрүҥүн, туох санааттан киириэн, туттарсыан баҕарарын чопчулаһыан сөп.

Болҕой: оттон орто анал үөрэх (СПО) абитуриеннара СПО бырагыраамаларыгар туттарсааччылар докумуоннарын «Биир түннүккэ» буолбакка, туттарсар колледжтарын, институттарын уонна факультеттарын сүүмэрдиир хамыыһыйатыгар бэйэтигэр иддьэн туттараллар. Онно тиийэн үөрэхтэр бырагыраамаларын кэрискэтин, үөрэххэ ылыы усулуобуйатын, туох докумуоннар ирдэнэллэрин билиэххит.

Ол курдук, үөрэх ханнык бырагырааматын талары, үөрэх ис хоһоонун, ханнык тургутар бэрэбиэркэ ирдэнэрин, быраактыканы ханна баралларын, карьера кэскилин уонна уратытын чопчулаһарга тустаах хайысха Сүүмэрдиир хамыыһыйатыгар ыытыахтара.

Бу маннык хабааннаах дьаһаныыны үөрэххэ туттарсааччы докумуоннары туттарыынан  эрэ муҥурдаммакка, туттарсыан саныыр үөрэҕин туһунан сиһилии билэригэр уонна бигэ быһаарыныыны ыларыгар туһалыа диэн, толкуйтан киллэрбиттэр.

Үөрэххэ туттарсааччыттан ирдэнэр докумуоннар

Пааспар, аттестат/диплом куоппуйата, СНИЛС (баар түгэнигэр), тус ситиһиилэри туоһулуур докумуоннар, 3х4 кээмэйдээх хаартыска, 086y/29H медицинскэй ыспыраапка. Ону таһынан үөрэххэ киириигэ чэпчэтиинэн туһанар категорияҕа киирсэр, бастакы уочарат киирэр бырааптаах буоллаххына, онно тирэх буолар докумуоннары холбуу туттараргын умнума.

*Санатыы: оттон тус сыаллаах үөрэххэ туттарсааччылар докумуоннары «Работа России» порталга сайаапкалаһаллар.

Үөрэххэ туттарыы быраабылатыттан

-Абитуриент биэс үрдүк үөрэх кыһатыгар уонна онно биэстии идэҕэ сайабылыанньа биэриэн сөп.

-Сайабылыанньаны суруйарга ити идэлэртэн хайата тутаах суолталааҕын (приоритет), чуолаан ханныкка ордук баҕараргытын наардыыргыт ирдэнэр.

-Дьиҥ докумуон (оригинал) оннугар биир үөрэх тэрилтэтигэр киирэргэ сөбүлэҥ (согласие на зачисление) диэни толорон бэриллэр. Ону Тутар хамыыһыйаҕа бэйэ тиийэн туттарыаххын эбэтэр «Госуслуги» порталга онлайн ыытыахха сөп.

Болҕой: Докумуоннарын туттарыы болдьоҕо СКЭ (ЕГЭ) түмүгүнэн туттарсааччыларга –  от ыйын 25 күнүгэр диэри буолуоҕа.

Оттон университет ыытар анал тургутугун ааһыы ирдэнэр үөрэхтэргэ (айар куонкурустаах,  идэтийиини туоһулуур эбэтэр  уопсай үөрэхээһин биридимиэттэригэр туттарыылаах түгэнигэр) туттарсааччылар эрдэлээн, от ыйын 19 күнүгэр эрэ диэри туттарар кыахтаахтар. Маны учуоттаа.

От ыйын 27 күнүгэр куонкурустаһааччылар испииһэктэрэ тахсыаҕа. Оттон үөрэххэ ылыы туһунан бирикээс атырдьах ыйын бастакы күннэриттэн саҕалаан тахсыталаан барыа. Онуоха бастаан утаа приоритетнай түһүмэх түмүгэ тахсыа, дьэ, ол кэниттэн тутаах түһүмэх, ол кэнниттэн эбии түһүмэх түмүгэ биллиэҕэ.

Чат-бот уонна СКЭ калькуляторын туһунан

«Макс» мессенджергэ «Абитуриент СВФУ» диэн, абитуриеннарга тутаах иһитиннэриини судургутук  буларга көмөлөһөр чат-боту оҥорбуттар.

Оттон СКЭ калькуляторын көмөтүнэн, үөрэххэ туттарсааччы бэлэм халыыпка СКЭ түмүгүнэн ылбыт баалларын толорон, ордук ханнык идэлэргэ киирэр кыаҕа улаханын билсиэн сөп.  

Болҕой: орто үөрэх кэнниттэн туттарсыыга – бэлиэ уларыйыы!

 2026 сылтан саҕалаан, орто анал үөрэҕи бүтэрбиттэр онно ылбыт идэлэрин хайысхаларыгар эрэ сыһыаннаах үрдүк үөрэххэ, ВУЗ эксээмэнин туттаран баран, киирэр кыахтаахтар.

Оттон үрдүк үөрэххэ туттарсар хайысхалара ылбыт орто үөрэҕи бүтэрэн ылбыт идэлэриттэн атын,  туһунан хайысхалаах түгэнигэр,   быйылгыттан СКЭ түмүгүнэн эрэ туттарсыахтарын сөп буолла.

Онуоха быйылгы 2026-27 үөрэх дьылыгар 2022-2026 сыллардааҕы СКЭ түмүгэ дьайар.

Колледжка ылбыт идэҕитинэн ханнык үрдүк бырагыраамата барсарын Киин тутар Хамыыһыйа саайтыгар биитэр бэйэҕит кинилэргэ тиийэн чопчулаһыаххытын сөп.

Түмүк оннугар

ХИФУ Киин тутар хамыыһыйата, олоҕурбут үгэс быһыытынан, үөрэххэ туттарсааччыларга анаан бакалавриат, специалитет уонна СПО үөрэтэр бырагыраамаларын толору каталогун бэлэмнээбит. Онно киирэн, иннинээҕи сылларга төһө бааллаахтартан саҕалаан бюджет уонна төлөбүрдээх үөрэххэ киирбиттэрин (проходной баал) билсэр кыахтааххыт.

Ону таһынан ХИФУ үөрэххэ туттарсыыга сыһыаннаан хас да быһа эпиири ыытан турар. Ол устуутун үөрэх кыһатын VK Видео уонна Rutube баар страницатыгар булан, көрүөххүтүн сөп. 

Киин тутар хамыыһыйа 2026 сыл бэс ыйын 20 күнүттэн үлэлээн саҕалаата. Түстэммит аадырыһа: Кулаковскай уул., 42, ГУК, 131 уонна 123 “а” хосторго.

Туймаада ыһыаҕын кэмигэр, бэс ыйын 27 уонна 28 күннэригэр Киин тутар хамыыһыйа өрүүр. Онтон атын күннэргэ эһигини сарсыарда 10:00 чаастан киэһэ  17:00 ч диэри күүтэллэр. 

Сиһилии иһитиннэриини ХИФУ Киин тутар хамыыһыйатыттан ыйылатаһаргыт, чопчулаһаргыт ордук.   

Билсэр ыйыталаһар төлөпүөн: +7 (4112) 49-69-62 (тутар хамыыһыйа киэнэ), ону тэҥэ итии лииньийэ нүөмэрэ үлэлиэ: +7 (4112) 25-11-22 , e-mail аадырыһа: priem@svfu.ru.