Үөрэххэ, билиигэ угуйар үтүө көҕүлээһин

Ааспыт нүөмэргэ ХИФУ 30 бастыҥ 1 кууруһун устудьуона сэтинньи ыйга бигэргэммит Уһук-Илин устудьуоннарыгар көрүллэр Г.И. Невельскэй аатынан истипиэндьийэни ылар буолбуттарын туһунан суруйан турабыт. Чопчулуур буоллахха, үөрэххэ ситиһиилээх устудьуоннары өйүүр бу истипиэндьийэни ордук элбэх оҕо ХИФУ филологическай факультетыттан – 7, ИЗФиР – 6, МИ – 4, ИЯКН ССВ РФ – 3, атын факультеттартан биирдии-иккилии устудьуон ылар буолбуттар.
Бүгүн биһиги Г.И. Невельскэй аатынан истипиэндьийэни ылар чиэскэ тиксибит устудьуоннары кытта кэпсэттибит.

Айталыына Гоголева,  ФЛФ суруналыыстыка салаатын 1-кы кууруһун устудьуона:

– Суруйарбын, араас тэрээһиҥҥэ сылдьарбын, тэрээһин туһунан сырдатарбын сөбүлүүр буолан, бу идэни талбытым. Талбыт идэбин уопсастыба олоҕор дьоһун суолталааҕынан ааҕабын.

Устудьуон быһыытынан олоҕум толору ис хоһоонноох, үөрэтэр биридимиэттэрим олус интэриэһинэйдэр, преподавателлэрбит бары идэлэрин толору баһылаабыт үтүө дьон. Устудьуоннар уопсай дьиэлэрин Сүбэтин көхтөөх кыттааччытабын, Сүбэ үлэтэ үгүс үөрүүнү уонна умнуллубат түгэннэри бэлэхтиир.

Бу истипиэндьийэ литература биир кэлим эксээмэнигэр 100 баалы ылбыт буоламмын ананна. Маннык истипиэндийэлэр устудьуон дьону инники ситиһиилэргэ көҕүлүүллэр.

Аэлита Стручкова, юридическай факультет 1-кы кууруһун устудьуона:

– Оҕо эрдэхпиттэн юрист буолар баҕа санаалаах этим. Үөрэх билиҥҥи туругунан этэҥҥэ баран иһэр. Устудьуон сылларым олус интэриэһинэйдик саҕаланнылар. “Сэргэлээх уоттара” Култуура киинигэр «Уран» үҥкүү ансаамбылыгар сылдьыбытым. Араас кэнсиэркэ, тэрээһиҥҥэ, куонкуруска кыттан, олус элбэҕи биллим, үөрэнним, сайынным. Университеппыт ыытар тэрээһиннэригэр көхтөөхтүк кытта сатыыбын.

Невельскэй аатынан истипиэндьийэҕэ хапсыбыппыттан олус үөрдүм, долгуйдум. Бу истипиэндьийэни Бүтүн Арассыыйатааҕы олимпиада призера буолан ылар чиэскэ тигистим.

Виолетта Горохова, ИТИ архитектура салаатын 1-кы кууруһун устудьуона:

– Инженернэй-тэхиньиичэскэй институт “Архитектура” специальноһыгар үөрэнэбин. Бу идэни тоҕо талбыккыный диир буоллахха, хаһыс да сылын уруһуйунан дьарыктанабын, тэхиньиичэскэй биридимиэттэри чэпчэкитик ылынабын. Архитектура диэн айар үлэни математиканы кытта дьүөрэлиир идэ буолар. Үөрэхпит, биллэн турар, ыарахаттара суох буолбатах, ол эрээри олус умсугутуулаахтык баран иһэр. Университет олоҕор кыаҕым иһинэн көхтөөхтүк кыттабын. Невельскэй аатынан истипиэндьийэ бу үөрэххэ киирэрбэр көмөлөспүт өрөспүүбүлүкэтээҕи “Архитон” олимпиада кыайыылааҕа буоларбынан ананна. Бу истипиэндьийэ билигин оскуолаҕа үөрэнэ сылдьар оҕолор оскуола таһынааҕы бырайыактарга кытталларыгар, билиилэрин, уопуттарын кэҥэтэллэригэр үтүө көҕүлээһин буолуо дии саныыбын. Бу истипиэндьийэбитин сотору кэминэн ылан барыахпыт.

Хаартыскалар: Дьоруойдар тус архыыптарыттан