Үөрэх эйгэтин быйылгы сыыппаралара

Маҥнайгы кылааска 9 691 оҕо киирбит. Оскуолаларга маҥнайгы кылааска ылыы балаҕан ыйын 5 күнүгэр диэри салҕанар. Ол иһин саҥа үөрэнэ барааччылар ахсааннара өссө эбиллиэн сөп.

9-с кылааска – 15 121, 11 кылааска 8 021 оҕо үөрэнэр.

627 үөрэх тэрилтэтэ саҥа үөрэх дьылыгар бэлэм.

Быйыл Дьокуускайга 253 миэстэлээх 1 №-дээх оскуола, Жатайга 840 оҕону ылар кыахтаах “Точка будущего” үөрэх комплекса үлэҕэ киирдилэр. Маны тэҥэ Адаптивнай комплекс иккис уочарата үлэлээтэ – 150 миэстэлээх интэринээт, 200 миэстэлээх уһуйаан аһылынна. Сунтаарга 450 миэстэлээх политехническай лицей саҥа дьиэтэ арылынна.

Мэҥэ Хаҥалас Маттатыгар оскуолалара хапытаалынай өрөмүөннэннэ. 2026 сылга Нерюнгри, Уус Алдан, Горнай, Чурапчы уонна Дьокуускай уһуйааннарыгар хапытаалынай өрөмүөн ыытыллар.

Саха сирин үөрэҕин систиэмэтигэр уопсайа 31 032 педагог үлэлиир, оскуолаларга  – 18 105, ол иһигэр учуутал ахсаана – 13 669.

Үөрэх дьылын саҕаланыыта 800 вакансия баар. Ордук математика, физика, нуучча тыла уонна литературата, алын кылаас, английскай тыл учууталларыгар хоту улуустарга уонна бөдөҥ куораттарга наадыйаллар.

2026 сылга “Земскэй учуутал” бырагыраамаҕа 40 вакансия баарыгар 173 сайаапка киирбит. 40 педагог үлэлии барбыт, ол иһигэр 16 – хоту улуустарга. Бырагырааманан үлэлии барбыт учууталлар 2 мөл. солк. федеральнай төлөбүрү ылбыттар.

Уопсайа 33 муниципальнай тэриллиигэ 76 “земскэй учуутал” үлэлии сылдьар. Бырагыраама 2020 сылтан үлэлиэҕиттэн 14 дуогабар баттаспыт педагог бары биэс сылларын толорбуттар уонна өрөспүүбүлүкэҕэ үлэлии хаалбыттар.

2027 сылга “Земскэй учуутал” бырагырааманан 45 учуутал үлэ булуоҕа (онтон кэлэр сылга 50, салгыы 55 учуутал хантараак түһэрсиэхтээх).

Балаҕан ыйын 1 күнүттэн учууталлар хамнастарын акылаата үрдэтиллибит.

Матырыйаал “Якутия 24” ханаалга СӨ Үөрэҕин миниистирэ Нюргуна Соколова интервьютугар тирэҕирэн оҥоһулунна.