Үөрэх дьыла чугаһаата. Эрэһииммитин көннөрүнүөххэ

Оскуолаҕа, уһуйааҥҥа барбыт оҕо бастаан утаа сылайар, ноҕоруускатын ыарырҕатар, ол иһин ОРВИ-га ылларымтыа буолар. Ону кытта, педиатрдар суруйалларынан, хараҕынан көрөрө уонна уҥуоҕун көнөтүк туттан сылдьара мөлтөөн барар.  Маныаха гигиенаны уонна эрэһиими тутуһуу наада буолар.

Оҕо хараҕын 45 мүнүүтэ буола-буола сынньатыахтаахпыт – 5-10 мүнүүтэ халлааны көрөн, түннүгүнэн ырааҕы одуулаан ылар.

Оттон бөгдьөйүү, тоноҕос токуруйуута, тилэх лаппайыыта (плоскостопие) алын кылаастарга ордук үөскүүр – маныаха анал хамсаныылар, эмтиир физкультура көмө буолар кыахтаахтар.

Оскуолаҕа киириэх иннинэ оҕо тииһин барытын эмтэтиэхтээхпит. Сыл устата туох да мэһэйдээбэтин курдук, араас ыарыыбытын сиһилии чинчийтэрэн, туоратарга кыһаллабыт.

Арассыыйа Доруобуйа харыстабылын министиэристибэтин сүбэтиттэн:

3 сааһыгар диэри оҕо эрэһиимэ ыһылыннаҕына хаппырыыстыыр, утуйбат буолан хаалар. 

Кыра оҕо наар биир кэмҥэ утуйуохтаах-туруохтаах. Хайаан да күнүскү утуйуу диэн баар буолуохтаах. Аһара сырдык, күүскэ мичиҥниир уот-күөс, улахан музыка суох буоларыгар кыһаллабыт.

3-6 саастаахтар

Кинилэргэ эмиэ биир олохтоммут эрэһиим ыһыллыбат. Күннэрэ 10-15 мүнүүтэлээх чуумпу оонньууттан саҕаланыахтаах. Хамсаныылаах оонньуу кэннэ олорон эрэ саараныыны алтыһыннарабыт. Күнүс хайаан да утутан ылабыт. 

 7–12 саастаахтар

Уһун өрөбүллэри, каникуллары бииргэ былаанныахтаахпыт - оҕо инникитин билэр, бэлэм буолар.

Күн бастакы аҥаарыгар төһө кыалларынан гаджеттары аччатабыт, остуол оонньууларын, кинигэни ааҕыыны киллэрэбит. 

Ханна эмэ атын сиргэ да сылдьан оҕо элбэх дьонтон сынньана түһэр усулуобуйалаах буолуохтаах.

12–17 саастаахтар

Обургу оҕо бэйэтин иннин бэйэтэ быһаарынарга дьулуһар. Ол эрэн улахан киһи көрүүтэ-истиитэ син биир наада. Аһара күүстээх хонтуруолга охтубакка, барытын истиҥ кэпсэтиинэн ситиһэбит. Өрөбүллэргэ, уһун каникулларга тугу гыныахха сөбүн, ханна бараргытын барытын бииргэ былааннааҥ.

Табаарыстарын кытта көрсөр буоллаҕына кимниин, ханна, хаһан, хайдах, тугу гына сылдьарын туһунан сөп буола-буола иһитиннэриэхтээх - бу хаһан баҕарар кэһиллибэт быраабыла.