Үрдүк уонна орто анал үөрэх тэрилтэлэригэр докумуоннары тутуу саҕаланна

СӨ үөрэҕириигэ уонна наукаҕа министиэристибэтэ иһитиннэрбитинэн, быйыл үрдүк үөрэх кыһаларыгар – 5277, оттон орто анал үөрэхтээһин систиэмэтигэр 6,8 тыһыынчаттан тахса бүддьүөт миэстэтэ көрүллүбүт.

Докумуоннары үс ньыманан туттарыахха сөп: тутар хамыыһыйаҕа тиийэн, Арассыыйа почтатынан уонна «Госуслуги» портал нөҥүө онлайн. Манна даҕатан эттэххэ, үрдүк үөрэххэ докумуоннары тутуу от ыйын 25 күнүгэр диэри салҕаныа.

Тус сыаллаах үөрэх тиһигэ толору уларыйда: билигин хас биирдии квота чопчуланар, онон абитуриент ханнык тэрилтэҕэ (сакаасчыкка) үөрэнэрин, ханнык бырагырааманан уонна кэлин ханна үлэлиэхтээҕин эрдэттэн билэр.

Өрөспүүбүлүкэ үрдүнэн 932 тус сыаллаах миэстэ тыырыллыбыт, онтон улахан аҥаара – 452 миэстэ – мэдиссиинэ хайысхатыгар, 117 – педагогикаҕа, 52 – агропромышленнай комплекска уонна 26 – тырааныспар тэрилтэлэригэр.