Үрдүк үөрэх кыһаларыгар 50 тыһыынчаттан тахса сайабылыанньа киирбит

Ол курдук, Саха сиринээҕи үрдүк үөрэх тэрилтэлэригэр абитуриеннартан 50 тыһыынчаттан тахса сайабылыанньа киирбит. Ордук улахан интэриэһи медицина уонна инженернэй-тиэхиньиичэскэй хайысхалар тардаллара бэлиэтэммит.

2026/2027 үөрэх дьылыгар үрдүк үөрэх кыһаларыгар 5277 бүддьүөт миэстэтэ көрүллүбүт, ол иһигэр:

• Бакалавриат уонна специалитет бырагыраамаларынан – 3739;
• Магистратураҕа – 695;
• Аспирантураҕа – 44;
• Ординатураҕа – 112;
• Орто анал үөрэххэ – 687 миэстэ.

М.К. Аммосов аатынан Хотугулуу-Илиҥҥи федеральнай университекка 10 095 абитуриентан 48 976 сайабылыанньа киирбит (ааспыт сыллааҕы көрдөрүү – 38 504). 2026/2027 үөрэх дьылыгар ХИФУ-га 4036 бүддьүөт миэстэтэ тыырыллыбыт. Тус сыаллаах үөрэххэ 288 киһи киирбит, туспа квотанан – 207, анал квотанан – 126.

ХИФУ-га тиэхиньиичэскэй хайысхаларга интэриэс улааппыт: 9790 сайабылыанньа (2025 сылга – 7726, 2024 сылга – 5988). Педагогическай хайысхалар эмиэ киэҥ сэҥээриини ылаллар – 5207 сайабылыанньа (былырыын – 4554).

Ордук биһирэнэр идэлэр:

• «Юриспруденция» – 2053 сайабылыанньа;
• «Эмтиир дьыала» – 1645;
• «Тутуу» – 1535;
• «Экономика» – 1064;
• «Стоматология» – 770;
• «Электроэнергетика уонна электротехника» – 688;
• «Ньиэп, гаас дьыалата» – 686.

Арктикатааҕы судаарыстыбаннай агротехнологическай университекка бүддьүөт миэстэтэ барыта туолбут – 724 киһи киирбит. Тус сыаллаах квотанан – 132 устудьуон. Төлөбүрдээх үөрэҕи учуоттаан туран, үрдүк үөрэх кыһатыгар 850-тан тахса бастакы куурус устудьуон киирбитэ бэлиэтэнэр. Агрономия, зоотехния, агроинженерия уонна ветеринария курдук хайысхалар ордук киэҥник биһирэнэллэр.

2026 сылга Арктикатааҕы култуура, искусство уонна креативнай индустриялар судаарыстыбаннай университета 27 хайысханан устудьуоннары ыларын иһитиннэрдилэр. 2026/2027 үөрэх дьылыгар манна 122 бүддьүөт миэстэтэ көрүллүбүт.