Өрөспүүбүлүкэ тыатын сирин быйылгы бастыҥ ыаллара кимнээҕий?

Бу, өрөспүүбүлүкэ таһымнаах куонкурус Арассыыйа Бэрэсидьиэнэ Владимир Путин көҕүлээбит «Дьиэ кэргэн» национальнай бырайыак чэрчитинэн сыллата ыытыллар. Быйыл куонкурус бэлиэр 10-с төгүлүн ыытыллыыта. Куонкурус сыала — оҕону иитиигэ, үтүө үгэстэри үйэтитиигэ дьоһун кылааттарын киллэрсэр уонна көхтөөх гражданскай позицияларын көрдөрбүт, атыттарга үтүө холобур буолар кыахтаах бастыҥ дьиэ кэргэттэри – ыаллары быһаарыы буолар.

Кыайыылаахтары наҕараадалыыр үөрүүлээх тэрээһин Нам улууһун ыһыаҕын кэмигэр, бэс ыйын 21 күнүгэр буолла. Тэрээһин Саха сирин биллэр судаарыстыбаннай уонна политическай диэйэтэлэ Илья Егорович Винокуров төрөөбүтэ 130 сылыгар уонна аатырбыт олоҥхоһут Прокопий Прокопьевич Ядрихинский – Бэдьээлэ төрөөбүтэ 125 сылыгар ананна.

«Сыл дьиэ кэргэнэ-2026» өрөспүүбүлүкэтээҕи куонкурус «Тыа сирин дьиэ кэргэнэ» номинациятын кыайыылаахтарын уонна кыттааччыларын Ил Түмэн Бэрэссэдээтэлэ Алексей Еремеев, СӨ Үлэҕэ уонна социальнай сайдыыга миниистирэ Елена Волкова уонна Нам улууһун баһылыга Юрий Слепцов эҕэрдэлээтилэр.

«Хас биирдии тыа сирин дьиэ кэргэнэ территориялары сайыннарыыга, үгэстэри үйэтитиигэ, үлэҕэ-хамнаска, муударай буолууга уонна көлүөнэлэр утумнаһыыларыгар сүҥкэн кылааты киллэрэр. "Тыа сирин дьиэ кэргэнэ" номинация кыттааччылара бары элбэх оҕолоохторо үөрдэр. Тыа сиригэр элбэх оҕолонуу – хаһан баҕарар күүс-кыах, туруктаах олох уонна ил-эйэ бэлиэтэ. Биһиги уопсастыбабыт ханнык бөҕө, бигэ тирэхтэргэ тирэҕирэрин эһиги үтүө холобургут  дьэҥкэтик көрдөрөр. Эһиги оҕолоргутун хардарыта көмөлөһүү тыыныгар иитэҕит, кинилэри айарга-тутарга уонна өбүгэ дьону ытыктыырга үөрэтэҕит. Бигэ дьиэ кэргэн –  өрөспүүбүлүкэбит киэн туттуута! Оҕо иитиитигэр кыһамньыгыт, сыраҕыт-сылбаҕыт, ыраас-сырдык санааҕыт, өбүгэлэр үгэстэригэр бэриниигит иһин, махтанабыт!» – диэн бэлиэтээтэ үлэ миниистирэ Елена Волкова.Бу туһунан АГиП дьаһалтатын  пресс-сулууспата иһитиннэрдэ.

Быйыл «Сыл дьиэ кэргэнэ» өрөспүүбүлүкэтээҕи куонкуруска «Тыа сирин дьиэ кэргэнэ» номинацияҕа хаһаайыстыбаны, үлэни уонна оҕону иитиини ситиһиилээхтик дьүөрэлии тутар, уопсастыбаннай олоххо көхтөөхтүк кыттар 15 көхтөөх, айар-тутар дьоҕурдаах, үлэни өрө туппут  дьиэ кэргэн талыллан кыттыбыт.

Куонкурус түмүгүнэн 1 миэстэни Чурапчы улууһуттан Иван уонна Анастасия Шоломовтар ылбыттар. Кинилэр СӨ Ил Дарханын 300 тыһыынча солкуобайдаах бирииһин туттулар.

2 миэстэни Нам улууһуттан Радик уонна Матрена Лукиннар ылан, 200 тыһыынча бириистэннилэр.

3 бочуоттаах миэстэни ылбыт Амма улууһун олохтоохторо Гаврил уонна Сардана Чемезовтарга 100 тыһ. солк. туттулар.

Ону таһынан Усуйаана улууһуттан кыттыбыт Иннокентий уонна Туяра Гороховтар уонна Нам улууһуттан Семен уонна Татьяна Кривошапкиннар дьиэ кэргэттэрэ Нам улууһун дьаһалтатын анал бириистэринэн — 50-нуу тыһыынча солкуобайдаах сэртипикээти ыллылар. 

Кыайыылаахтарга уонна кыттыбыттарга итии-истиҥ эҕэрдэ! Бастыҥ ыал быһыытынан холобурга сылдьыҥ, үтүө, сырдык санаа дэлэйэригэр, ил-эйэ олохсуйарыгар, оҕо иитиитигэр эппиэтинэс улахан буоларыгар тус кылааккытын киллэрсэ, айа-тута сылдьыҥ, өбүгэ үгэстэрэ, сахалыы сиэр-майгы үйэтийэригэр тирэх буола туруҥ!