Өрөспүүбүлүкэ үрдүнэн соҕотох приют

Приют 2020 сылтан үлэлиир. Куратор Мария Чемпина кэпсээбитинэн, күн бүгүн икки дьиэ кэргэн баар. Манна ыарахан балаһыанньаҕа түбэспит, олорор дьиэлэрэ умайан барар-кэлэр сирдэрэ суох, улуустан куоракка кэлээччи түһэр ыала суох, атаҕастаммыт дьахталлар, тиийиммэт-түгэммэт олохтоох, оҕолоох дьахталлар кэлэллэр.

Манна кэлбиттэргэ олус истиҥ дьиэтээҕи сыһыан олохсуйбут, сүбэ-ама, консультация, оннооҕор интэриниэтинэн туттарга, наадалаах докумуоннары оҥорорго үөрэ-көтө көмөлөһөллөр.

Приютка сарсыарда 9.00-18.00 чч. диэри эрийэн билсиэхтэрин, оттон түүҥҥү өттүгэр суһаллык кэлэр дьон полиция нөҥүө түүннэри да кэлиэхтэрин сөп.

Улуустан кэлээччилэр социальнай тэрилтэлэргэ билсэллэр. Барыта 15 куойка миэстэлээх. Олорор усулуобуйа барыта баар. Уопсай куукуна, хос аайы холодильник, олорооччулар бэйэлэрэ астаналлар, оҕолорго аналлаах аралдьыйар хос баар. Кинилэр манна уруоктарын ааҕаллар, оонньууллар, уруһуйдууллар, пазл таҥаллар. Маны таһынан уйулҕа үөрэхтээҕэ, юрист, педагог, социальнай үлэһит бааллар.

Үбэ-харчыта суох дьон аһылык да атыылаһаллара ыарахан буолар, онон аһынан-таҥаһынан көмөлөһүөн баҕалаахтары үөрэ-көтө көрсөллөр.

Кэлээччиттэн эбэһээт ФЛГ ирдэнэр, хат дьахталларга социальнай өттүнэн кыамматын туһунан ыспыраапкалаах буолуохтаах.

Приют куорат киинигэр баар; хомойуох иһин, кураанах турбат, мэлдьи араас түгэҥҥэ түбэспит оҕолоох ийэлэр күннэтэ киирэллэр.

Бу приют бүддьүөттэн үбүлэммэт. Социальнай бырайыак “Саха-Азия оҕолоро” аан дойдутааҕы пуонда граныгар кыайан үлэлии турар.

Билсэр төлөпүөн: 8924-898-39-17, манна эрийэн кыһалҕалаах дьон билсиэххитин сөп. Маны таһынан Ватсап, Макс, Телеграм ханааллаахтар.