Өрөспүүбүлүкэ олохтоохторо түөкүттэргэ 2 мөл. кэриҥэ солкуобайы ыыттылар

Ол курдук, үс киһи бу өрөбүл күннэргэ түөкүттэри “байыттылар”. Өрөспүүбүлүкэ полиция салааларыгар түөкүннээһин туһунан үс иһитиннэрии киирдэ. Уопсай хоромньу 2 мөлүйүөн кэриҥэ солкуобайга тиийбитин туһунан ИДьМ пресс-сулууспата иһитиннэрэр.

Мииринэй оройуонугар 45 саастаах суоппарга быраабы араҥаччылыыр уорган үлэһиттэрин аатыттан төлөпүөннээбиттэрин түмүгэр кирэдьииккэ киирэн туран 1 мөлүйүөнтэн тахса солкуобайын уордарбыт.

Нолуок управлениетын, Росфинмониторинг, Киин баан сымыйа үлэһиттэрэ Дьокуускай куорат 39 саастаах сыах маастарыгар олунньу бүтүүтүттэн саҕалаан тус уонна кирэдьиит харчытыттан 640 тыһыынча солкуобайын кинилэргэ ыытарга тылларыгар киллэрбиттэр.

“Госуслуги” уонна Киин баан сымыйа үлэһиттэрэ 24 саастаах бариста эдэр дьахтарга эрийбиттэр. Кинилэр албыннааһыннарын түмүгэр эдэр кыыс 243 тыһыынчаттан тахса солкуобайы сүтэрбит.

Санатан эттэххэ, түөкүттэр сиэртибэлэрин кытта видеонан уонна биллэрии таһаарар өҥө нөҥүө сибээстэһэллэр, чэпчэки сыаналаах билиэттэри уонна чэпчэки инвестициялары эрэннэрэллэр, кинилэр “Госуслуги” аккауннарын алдьатыахпыт диэн куттууллар уонна искусственнай өйү туһаналлар.