Өрөспүүбүлүкэҕэ орто анал үөрэх сайдар чинчилээх

Саха сирин орто анал үөрэҕин тэрилтэлэригэр саҥа үөрэх дьыла 28,7 тыһыынчаттан тахса устудьуоҥҥа саҕаланна. Каадырдары бэлэмнээһин 50 үөрэх тэрилтэтигэр 211 идэҕэ уонна исписээлинэскэ аҕыс сүрүн хайысханан ыытыллар. Устудьуоннар 70-ча бырыһыаннара өрөспүүбүлүкэ бүддьүөтүн суотугар үөрэнэллэр. Бу туһунан СӨ Үөрэххэ уонна билимҥэ министиэристибэтэ иһитиннэрэр.

Бэлиэтээн эттэххэ, Саха сиригэр орто анал үөрэх систиэмэтин сайыннарыы дойду Бэрэсидьиэнэ Владимир Путин көҕүлээбит «Ыччат уонна оҕолор» национальнай бырайыак чэрчитинэн, ону тэҥэ «Биир ньыгыл Арассыыйа» норуодунай бырагырааматын «Саҥа оскуола» федеральнай бырайыагынан ыытыллар.

2026 сылга Саха сиригэр орто анал үөрэх тэрилтэлэригэр 19 саҥа идэ арыллыбыт, ол иһигэр хат сөргүтүллүбүттэр бааллар. Олор истэригэр – «Тутууга информационнай моделирование», «Ыксаллаах быһыыга-майгыга суһаллык хардарыыны тэрийии», «Биотехническай медицинскэй аппарааттары уонна систиэмэлэри таҥыы, тэхиньиичэскэй хааччыйыы уонна өрөмүөннээһин», о.д.а.

2027 сылга «Профессионалитет» федеральнай бырайыак чэрчитинэн Саха сиригэр энергетика, тырааныспар, тутуу, IT, электротехника, туризм уонна чэпчэки бырамыысыланнас хайысхаларынан сэттэ саҥа үөрэх кластера үлэлээн саҕалыаҕа.