Өрөспүүбүлүкэ быһылааннара

Нерюнгри оройуонугар буолбут  суол саахалыгар икки киһи суорума суолламмыт. «Тойота Виш» массыына суоппара сүр түргэнник айаннаан иһэн, утары кэлэр суолга тахсан, «Ниссан ЖУК» массыынаны кытта харсыспыт. Ол түмүгэр «Ниссан ЖУК» суоппара уонна олорсон испит пассажир сырдык тыыннара быстыбыт. РФ ХК 264 ыстатыйатын 5-с чааһынан холуобунай дьыала тэрилиннэ.

Суолга холуочук туруктаах массыынаны ыыта сылдьар 16 суоппары туппуттар.

Дьокуускай куорат прокуратурата сүр кырыктаахтык өлөрүүгэ (особая жестокость) уорбаланар дьахтар дьыалатын суукка ыыппыт. Силиэстийэ көрдөрбүтүнэн, куорат олохтооҕо дьахтар 2024 сыл муус устар ыйыгар дьиэ иһинээҕи кирилиэс турар былаһааккатын умаппыт. Бу акаары быһыы түмүгэр дьахтар ийэтэ уонна сокуоннай сааһын туола илик оҕо олохтон туораабыттар. Бу түбэлтэ кэнниттэн дьахтар буруйу оҥорбут сириттэн куота сылдьыбыт. Уһун кэм устата умайыы тахсыытыгар кини буруйдааҕа чопчуламмакка сылдьыбыт. Бу дьыл бэс ыйыгар силиэстийэлиир-көрдүүр үлэ дьахтар умаппытын быһаарбыт. Ол кэннэ кини оҥорбут ыар буруйугар толору билиммит.  Төрүөтэ – ордугургуур санаа. Уматар кэмигэр кыыс өйүттэн тахсыбыт туруктааҕа быһаарыллыбыт (состояние невменяемости). Инньэ гынан куорат прокуратурата кинини күһэлэҥ эмтэниигэ ыытары туруорсар үҥсүүнү суукка түһэрбит.  

Томпо оройуонугар балыктыы сылдьан, 1965 с.т. эр киһи ууга түспүтүн көрдүү сылдьаллар.
Ааспыт суукка устата Саха сиригэр 3 холуобунай буруйу оҥоруу тахсыбыта бэлиэтэннэ.
Дьокуускайга дьиҥнээхтик үөрэммэтэх киһиэхэ суоппар идэтин туоһулуур сибидиэтэлистибэни биэрии түбэлтэтэ тахсыбытын быһаарбыттар. 

Өрөспүүбүлүкэ киин куоратыгар массыыналары бэрэбиэркэлиир эриэйдэ кэмигэр ботуруоннары илдьэ сылдьар киһини туппуттар.  

--