Өрүс суолун сабыы туһунан

“Упрдор “Вилюй” ФКУ 2025 с. олунньу 21 күнүнээҕи “А-331 “Бүлүү” уонна Р-504 “Халыма” федеральнай суолталаах уопсай туһаныллар массыына суолларыгар муус суоллары сабыы туһунан” бирикээһигэр олоҕуран, муус устар 15 күнүттэн киин улуустарга баар өрүһү туоруур уонна кыһыҥҥы суоллар тырааныспар бары көрүҥэригэр сабыллыахтара. Оттон арктикатааҕы уонна хоту улуустарга муус устар 20-25 күннэригэр сырыы тохтуо. 

Маны тэҥэ “СӨ массыына суолун управлениета” 2025 с. кулун тутар 11 күнүнээҕи бирикээһинэн “Бүлүү” уонна “Халыма” федеральнай массыына суолларыгар өрүс суолун туорааһыҥҥа массыыналар уйуктарын түһүмэҕинэн намтатыы саҕаланар: Өлүөнэ өрүскэ “Дьокуускай – Аллараа Бэстээх” хайысханан, Алдан өрүскэ уонна Бүлүү өрүскэ: Үөһээ Бүлүү сэлиэнньэтин, Ньурба улууһун Күндээдэтин, Сунтаар сэлиэнньэтин, Кириэстээх нэһилиэгин аннынан  өрүһү туоруур суолга.

Бу өрүһу туоруур суолларга массыына уйугун намтатыы кыраапыга: муус устар 3 күнүттэн – 30 т диэри, муус устар 10 күнүттэн – 20 т диэри. Регионнааҕы уонна муниципалитеттар икки ардыларынааҕы суолталаах сезоннааҕы массыына суолларыгар уонна арктикатааҕы, хоту улуустарга массыына уйугун түһүмэҕинэн намтатыы муус устар 10 күнүттэн саҕаланыа.

Дьокуускайга өрүһү туоруур суол сабылынна да, хонтуруоллуур туһааннаах тэрилтэлэр холбоһуктаах рейдэҕэ, патрулааһыҥҥа тахсыахтара.

Быраабы кэһээччи СӨ административнай быраабы кэһии кодексатын 9.10 ыстатыйатынан (“СӨ судаарыстыбаннай былааһын эбэтэр олохтоох бэйэни салайыныы уоргана быһаарбыт нормативнай правовой аактатынан суолу хааччахтааһын кэмигэр тырааныспары мууска таһаарыы”) ыстараап көрүллэр:

- гражданнар 3 тыһ. солк. 5 тыһ. солк. диэри.

- дуоһунастаах сирэй – 20 тыһ. солк. 50 тыһ. солк. диэри.

- юридическай сирэй – 100 тыһ. 1 мөл. солк. диэри. 

Экстреннэй сулууспаны ыҥырыы биир кэлим нүөмэрэ: “112”, Дьокуускай куораттааҕы ЕДДС: 444-564

Дьокуускай уокуруктааҕы дьаһалтатын «УГОЧС уонна ОПБ» управлениетын иһитиннэриитинэн