Өрө көтөр тирии мээчик – көлүөнэттэн көлүөнэҕэ

«Киин куорат» 40 хамаанданан 480 спортсмены түмпүт күрэхтэһиини тэрийээччилэри, хамаандалар хапытааннарын кытта кэпсэттэ.

Ирина Николаева, волейбол күрэхтэһиитин тэрийбит 1987 сыллааҕы выпуск лидерэ:

– Выпусктар ортолоругар волейбол күрэҕин аан бастаан 2021 сыллаахха тэрийбиппит. Турнир ааптарынан үөлээннээхпит, выпускпут лидерэ, СахаВА бочуоттаах бэтэрээнэ Михаил Гуляев буолар.
Бастакы күрэхтэһиилэри орто оскуоланы 1980-1990 сс. бүтэрбиттэр ортолоругар ыыппыппыт. Быйыл арыый кэҥэтэн, 1970-1996 сс. хаптыбыт. Биллэн турар, ханнык баҕарар күрэхтэһиини тэрийии, спонсордары көрдөөһүнтэн, ыытар былаһаакканы булартан саҕалаан, ыарахаттардаах. Ол иһин биһиги эрдэттэн бөлөх тэринэн, былаанынан үлэлиибит. Бастатан туран, күрэхтэһиибитин волейбол федерацията сыллааҕы былааныгар киллэрэрин ситиһэбит. Былааҥҥа киирдэҕинэ, аны күрэхтэһэр саала куортамын харчытын көрдүүр сорук турар. Холобур, быйылгы күрэхтэһиигэ хамаандаларга усунуос олохтоон, 120 000 солк. төлөөтүбүт. Онон бары кыттааччыларга, волейболу сэҥээрээччилэргэ махтанабыт.

Марфа Иванова,  «Выпуск-96» хамаандатын хапытаана:

– Бу күрэхтэһиигэ биһиги саамай эдэрдэрбит. Оонньуубутун  университекка үөрэнэр сылларбар «Туймаада» хамаанда хапытаанынан сылдьыбыт уһулуччулаах спортсмен, волейбол номоҕо буолбут Ирина Монастырева көрө кэлбититтэн олус долгуйбутум даҕаны, эппиэтинэс даҕаны үрдээбитэ. Ирина Николаевна хас биирдии хамаанда сытыы киирсиини көрдөрбүтүн, чуолаан биһиги тиэхиньикэбитин хайҕаабыта ханнык да наҕараадатааҕар күндү. Аҕам сааска диэри спорт бу көрүҥүнэн утумнаахтык дьарыктана сылдьар дьону көрдөххүнэ, волейбол, чахчы, спорт королевата буоларын өйдүүр эбиккин. Онон тус бэйэм спорт бу көрүҥүн талбыппыттан олус үөрэбин.

Ол курдук, волейбол киһини спортсмен быһыытынан иитэн таһаарарын таһынан, бэрээдэктир. Бу хамаанданан оонньуу буолан, эрчиллиигэ барыаххын баҕарбат да буоллаххына, хамаанда туһугар дьиэ-уот, оҕо-уруу, о.д.а. тэрээһиннэртэн чорботон, быһаарыныы ылары ирдиирэ, саалаҕа мээчиктии барары ордоруу – бу бэрээдэк. Сыал туруорунарга уонна ону толорорго дьаныардаах буоларга иитэр уонна, биллэн турар, доруобуйа, чөл олох аргыһа.

Варвара Еремеева, «Выпуск-74» хапытаана:

– Сааһым 72-бэр бардым. Надежда Бубякина, Светлана Климова, Дария Петрова, Полина Гуляева, Гертруда Рожина курдук  күүстээх оонньооччулардаахпыттан хапытаан быһыытынан астынабын. Бу күрэхтэһиигэ биһиги саамай аҕа саастаахтарбыт. Күүстээх подачалаах, өрө ыстанан тахсан сытыы охсуулары оҥорор кыргыттары астына, үчүгэйинэн ымсыыра даҕаны көрөбүт. Мотрена Антонова (Выпуск-80), Ульяна Макарова (Выпуск-82), Любовь Егорова (Выпуск-85), Алена Аммосова (Выпуск-82) үрдүк тиэхиньикэлээх оонньууларын көрөр олус астык турук. Кыргыттар үгүстэрэ дьарыктанар кулууптарыгар хапытааннар. Кинилэри көрө-көрө бэйэбит ыккардыбытыгар оонньуу-күлүү кэриэтэ: «Саатар 4-5 сылы ылан бырахпыт киһии, өссө да оонньуу түһүллүө этэ»,– дэһэбит. Кэлиҥҥи кэмҥэ эдэр оҕолору, оскуола үөрэнээччилэрин уһуйар тренердэр баар буолбуттара хайҕаллаах. Биһиги эдэр сааспыт оонньуута волейбол бу курдук аныгы ыччат сэҥээритин ылан эрэрин куораппыт иһигэр саала былдьаһык буолара туоһулуур. Ол аата биһиги тапталлаах волейболбут утумнааччылардааҕа үчүгэй буолбаат! 

Бэйэбит нэдиэлэҕэ биирдэ хайаан даҕаны кулууптарбытынан дьарыктанабыт. Кыргыттарым миигин, «баабыскаларын» илдьэ сылдьалларыттан үөрэбин эрэ. Бу күрэхтэһии биир чаҕылхай оонньооччута Мотрена Антонова биһиги дьарыктанар «Стерх» кулууппут хапытаана. Волейбол хамаанда оонньуута буолан, эн төһө да күүстээх оонньооччу буолбутуҥ иһин, биир киһи курдук өйдөһөн-өйөһөн оонньооботоххуна, хотторуу хомолтотун билиэххэ сөп.
Выпусктарынан күрэхтэһии сылын аайы күүһүрэн иһэрэ үөрдэр. Бу да сырыыга чаҕылхай, умнуллубат оонньуу буолан ааста. Тоҕо диэтэххэ, волейбол күрэҕэ элбэх эрээри, бэйэҥ үөлээннээхтэргин кытта биир хамаанданан киирэн оонньуур – туһунан азарт! Онон тэрийээччилэргэ улахан махтал!

Любовь Егорова, «Выпуск-85» хапытаана:

– Бу күрэхтэһии биир үтүө үгэһинэн көһө сылдьар Кубогы эр дьон, дьахталлар хамаандаларын уопсай кыайыыларын түмүгүнэн туттараллара буолар. Биһиги «Выпуск-85» хамаандабыт ааспыт икки сылга кыайыылаах үрдүк аатын ылан, Кубогы үйэ-саас тухары хаалларбыт дьоллоохпут. Быйылгы күрэхтэһиигэ эмиэ бэйэбит бөлөхпүтүгэр бастааммыт, үһүс төгүлүн Кубокка тигистибит.
Саҥа көһө сылдьар Кубок олус кыраһыабай. Элбэх күрэхтэһиигэ сырыттым да, маннык кэрэ көстүүлээх Кубогы көрө илигим. Тэрийээччи выпуск анаан сакаастаан оҥотторбута олус үчүгэй. Аны туран, хамаандам кыргыттарыттан Нюргустана Сыромятникова «Лучший связующий», Надежда Полячкова «Лучший игрок» үрдүк ааты ылбыттарыттан олус үөрдүм. Хамаандаҕа  төһөнөн үчүгэй ситимнээччилээххин (связующай)  даҕаны, орто да охсооччу чулуу быһааччы (нападающай) буолуон сөп. Оттон хамаандаҕа ситим мөлтөх буоллаҕына, тутаах оонньооччу да мөлтөх оонньууну көрдөрүөн сөп.

Бу күрэхтэһиигэ бэлэмнэнэн, биһиги кыһыны быһа нэдиэлэҕэ биирдэ «Модуҥҥа» дьарыктанныбыт. Бары араас улуустан сылдьабыт: мин – Орто Халыматтан, Ньургустаана Сыромятникова – Томпоттон, Анастасия Акимова, Октябрина Попова, Людмила Флегонтова – Чурапчыттан, Марфа Прудецкая – Уус Алдантан, Екатерина Тимофеева – Хаҥаластан, Галина Федорова –Бүлүүттэн, Мотрена Кузьмина – Амматтан, Розалия Кармалах – Үөһээ Дьааҥыттан, Надежда Винокурова – Уус Майаттан, Светлана Аргунова – Мэҥэ Хаҥаластан, Розалия Сидорова – Намтан, о.д.а. Улууска олорор кыргыттарбыт бырайыас, аренда төлөбүрүн аахсыбакка дьарыктананнар, результат баар буолла.

Былырыын Сочига бэтэрээннэр күрэхтэригэр кыттан кэлбиппит.

Биһиги волейболга эрэ көрсөр буолбатахпыт. Кыргыттарым бука бары уран тарбахтаах иистэнньэҥнэр, сиэл оҥоһуктары, оҕуруо, быысыпка арааһын сатыыллар. Аны туран бары ырыаһыттар. Хас да студийнай записьтаах ырыалаахпыт. Онон биир тыынынан биир долгуҥҥа сылдьарбыт олус үчүгэй. Түгэнинэн туһанан сылын аайы бу күрэхтэһиигэ кыттар усунуоспутун выпускпут зодиактарынан түмсүүлэрэ төлүүллэрин бэлиэтиибит. Уонна оонньуубутугар кэлэн ыалдьар үөлээннээхтэрбитигэр махталбытын тириэрдэбит.
Түмүккэ маннык форматтаах күрэхтэһии толкуйдаммыта, үөлээннээхтэри кытта көрсөн алтыһар өссө биир интэриэһинэй тэрээһин баар буолбута наһаа үчүгэй диэхпин баҕарабын. Саала куортамын уйунар улахан тэрилтэ баара буоллар, өссө үчүгэй буолуо этэ.

2021 сылтан волейбол күрэхтэһиитин тэрийэр 1987 сыллааҕы выпускниктарга махталбытын тириэрдэбит!