«Үрүҥ хаар сипсиэрэ» тулабын сырдатта (быыстапка кэнниттэн санаалар)
Кини хартыыналарыгар ийэ сирбит тунал хаарынан үллүктэнэ сытан өссө киэркэйэр, тупсар. Ол да иһин көрөөччү быыстапканы үрүҥ хаарга тапталга билинии курдук ылыныан сөп.
Саалаҕа киирбит киһи тула өттө тута сырдыы түһэр. Тоҕо эбитэ буолла, манна төһө даҕаны кыыдааннаах кыһын ойууламмытын иһин, хас биирдии хартыынаттан итии салгын илгийэргэ, сылаас тыын биллэргэ дылы.
Худуоһунньук айымньыларыгар айылҕа иһийэн турар кэмигэр даҕаны олох тохтоон хаалбатын көрдөрөр. Кыһыҥҥы уу чуумпуну кылбаа маҥан хоптолор хаһыылара аймыыр, оттон ол диэки Дьөһөгөй оҕолоро, таныыларын тардырҕата-тардырҕата, субу тыбыырбытынан иһэллэр. Чуумпу тыалга кырыаҕа сууламмыт от-мас барбах суугунуур, ол онно ыраах тунал маҥан хайалар тунаарыһан тураллар.
Иһиллээбит курдук уу чуумпу, им-дьим, арай үрүҥ хаар эрэ сипсийэрэ иһиллэр. Оттон эн дойду ахтылҕаныгар куустараҕын, кыл түгэнигэр оҕо сааскар төннөн ылаҕын.
Аныгы балысхан сайдыылаах үйэ киһитэ мэлдьи бириэмэ сырсыытыгар сылдьар. Оттон Эдита Степанова айымньылара икки атахтаах айылҕаны кытта быстыспат ситимин, иннинэн сирэйдээххэ иһийии, иһиллэнии хайаан да наадатын санатар курдуктар.
Эдита Степанова живопиһынан, графиканан эрэ муҥурдаммат, араас арт-эбийиэктэри, инсталляциялары айан таһаарар. Ол үлэлэрэ быыстапканы ситэрэн, тупсаран, ис хоһоонун байытан биэрэллэр.
Кырыа кыһыммыт кэлэ да илигинэ сөбүлээн сылдьар түмэлбитигэр хайыы үйэ үрүҥ хаар үллүктэнэ түстэ – искусствоны таптааччылары тулабытын сырдатта.
Быыстапка үөрүүлээх аһыллыытын туһунан манна киирэн аах.
Сонуннар
Ордук ааҕаллар
