27.01.2024 | 14:00

Өрөбүллэргэ тугу астанабыт?

Өрөбүл аайы алаһа дьиэбит минньигэс ас сытынан туолара хас биирдии киһи сүрэҕин ураты сылаас иэйиинэн угуттуур, оҕо саас кэрэ кэмнэрин санатар, дьиэ кэргэни түмэр. Бүгүн ааҕааччыларбытыгар түргэнник астанар бүлүүдэлэр ырысыаптарын үөрэ-көтө бэчээттиибит.
Өрөбүллэргэ тугу астанабыт?
Ааптар: Айыына КСЕНОФОНТОВА
Бөлөххө киир

Апельсиннаах кекс

Туох наадата:

- сымыыт – 3 уст.;

- саахар – 120 г;

- ынах арыыта (сымныырын курдук, эрдэ таһаарар ордук) – 150 г;

- бурдук – 140 г;

- апельсин – 1 бөдөҥ

- ванилин – 10 г;

- разрыхлитель – 2 ч.нь.;

- бурдук – 240 г.

Астааһына:

Бурдугу разрыхлители кытта холбоон, улахан миискэҕэ сиидэлиибит. Апельсины сууйабыт, куурдабыт, түөркэ көмөтүнэн чараас гына хахтыыбыт (хаҕын бырахпаппыт). Суогун ыгабыт. Миэхэ 65 мл таҕыста.

Ынах арыытын саахары уонна ванилины кытта холбуубут. Онтон барытын бииргэ холбоон, үллүөр диэри миксеринэн ытыйтарабыт. Онно сымыыты биирдии-биирдии кутан миксердиибит, салгыы апельсин хаҕын уонна суогун эбэбит уонна үчүгэйдик булкуйабыт. Онтон разрыхлители кытта сиидэлэммит бурдугу кутан, хомуога суох буолуор диэри булкуйабыт. Хойуу сүөгэй курдук тиэстэ тахсыахтаах.

Тиэстэбитин кекс астыыр анал киэптэргэ 2/3 гына кутабыт, буһарыгар үллэн тахсар, ол иһин толору кутар наадата суох. 

Эрдэттэн сылыйбыт 180 кыраадыс итии духуопкаҕа 20-25 мүн. саһарыар диэри буһарабыт. Зубочистканан эбэтэр шпажканан анньан көрөн, буспутун-суоҕун бэрэбиэркэлиибит.

Кекстэри сойутан баран, саахар буудуратынан киэргэтиэххэ сөп. 

Отонноох бөрүөк

Туох наадата:

- моонньоҕон (эбэтэр атын ханнык баҕарар отон) – 200 г;

- саахар – 150 г;

- бурдук – 140 г;

- мас арыыта – 90 мл;

- хортуоппуй крахмала – 20 г;

- сымыыт – 3 уст. (бөдөҥ ордук эбэтэр 4 кыра сымыыт);

- разрыхлитель – 1 ост.нь.;

- ванилин – 0,25 ч.нь.;

- туус – 1 г.

Астааһына:

Бастаан духуопкабытын эрдэ холбоон, ититэ туруорабыт. Онтон миискэҕэ сымыыты, саахары, ванилины уонна тууһу кутан, миксеринэн үллүөр диэри ытыйабыт. Олус маҥхайыар уонна кытаатан хойдуор диэри гыныллыбат – аны тиэстэҕит тахсыа суоҕа. Миксердии туран мас арыытын эбэбит. Бурдугу разрыхлители кытта туспа холбоон сиидэлиибит, ол кэннэ сымыыттаах маассабытыгар кыра-кыра кутан, бытаан эрэсиимҥэ туруоран миксердиибит (эбэтэр лаппаакынан булкуйуохха сөп).

Моонньоҕону (сибиэһэйи) ыраастаан, сууйан куурдабыт. Тоҥ буоллаҕына, ириэрэр наадата суох. Отоммутун крахмалга булкуйабыт.

Тиэстэбит сорҕотун силикон киэпкэ (Ø 18-20 см) кутабыт, онно моонньоҕон аҥаарын тарҕатан уурабыт, онтон үрдүгэр хаалбыт тиэстэбитин, салгыы моонньоҕон ордугун кутабыт.

Бөрүөкпүтүн 180 кыраадыс итии духуопкаҕа 30 мүн. туруоран баран, фольганан бүрүйэбит уонна өссө 10-15 мүн. буһарабыт. 

Буспут бөрүөгү киэбигэр туруоран сойутар ордук, онтон атын иһиккэ көһөрөн, киэргэтэн баран, остуолга ууруохха сөп.  

Чизкейк

Туох наадата:

Коржка:

- крекер бэчиэнньэ (кунжуттаах буоллаҕына, өссө ураты амтаннанар) – 250 г;

- ынах арыыта – 150 г.

Начыыныгар:

- сымнаҕас иэдьэгэй (эбэтэр творожнай кириэм-сыыр) – 300 г;

- 33%-наах чөчөгөй (сливки) – 200 г;

- саахар буудурата – 60 г;

- ванилин – 1 ост.нь.;

- лимон суога  – 1 ч.нь.

Киэргэтиигэ:

- биэ эмиийэ – 100 г;

- мята – бэйэ сөбүлүүрүнэн.

Астааһына:

Крекери блендеринэн илдьиритэбит. Ынах арыытын кыра кубик гына бысталыыбыт. Иһиккэ кутан холбуубут уонна илиибитинэн үлтү мэлийэбит. Көпсөркөй уонна инчэҕэй маасса тахсыахтаах.

Киэп 20-22 см диаметрдаах төгүрүк эбэтэр эмаль миискэ, силикон эбэтэр пластик буолара ордук. Онно маассабытын тарҕата уурабыт, түгэҕин уонна кытыыларын илиибитинэн эбэтэр улахан ньуосканан үчүгэйдик чиҥэтэн, дэхсилээн биэрэбит. Онтон 10-15 мүн. морозильникка туруора түһэбит. 

Салгыы начыынын бэлэмниибит. Иэдьэгэйи биир кэлим маасса буолуор диэри блендердиибит. Кириэм-сыыр баар буоллаҕына, блендердиир наадата суох. Ону (эбэтэр блендердэммит иэдьэгэйи) иһиккэ кутан, саахар буудуратын, ванилины кытта холбуубут. Онно лимон суогун эбэбит. Онтон кириэммитигэр сөрүүн чөчөгөйү кутан, үллүөр диэри миксеринэн ытыйабыт. Хойуу сүөгэй курдук биир маасса буолуохтаах.

Коржпутун морозильниктан таһааран, онно начыыммытын кутабыт, лаппаакынан тэҥниибит. Чизкейкпитин холодильникка 3-4 чаас туруорабыт. Онтон 25 мүн. морозильникка уурабыт. Салгыы малинанан (эбэтэр атын отонунан, фруктанан, сакалаатынан), мята сэбирдэхтэринэн киэргэтэбит.

Лаваштан түргэн чебурек

Туох наадата:

- чараас лаваш – 300 г;

- эриллибит эт (ханнык баҕарар буолуон сөп) – 500 г;

- эриэппэ луук – 150 г;

- туус – бэйэ сөбүлүүрүнэн;

- мэлиллибит хара биэрэс – бэйэ сөбүлүүрүнэн;

- мас арыыта – 50 мл.

 

Астааһына:

Лавашпытын быһа холоон 15х45 см сурааһыннарга бысталыыбыт. Лаваш түргэнник хатар, ол иһин аһы суулуур анал пленканан бүрүйүөххэ эбэтэр пакекка уган эриэххэ сөп.

Эриллибит эти дириҥ иһиккэ кутабыт. Онно луугу ыраастаан, бытархай гына кырбаан эбэбит. Туус, биэрэс табыгынатабыт уонна илиибитинэн биир кэлим маасса тахсыар диэри булкуйабыт. Үчүгэйдик булкуллубат буоллаҕына, кыратык уу эбэн бэриллэр. Бэйэ сөбүлүүрүнэн ол-бу туманы, күөх үүнээйини кутан, амтанын өссө тупсарыахха сөп.

Эриллибит эти лавашка тэҥ өрүттээх үс муннук быһыылаах чебурек тахсарын курдук суоттанан, чараас гына тарҕатан биэрэбит, хаалбыт аһаҕас муннугу иһигэр суулуу тутабыт (хаартыскалары көр).

Барытын оҥорон баран ыһаарылыыр буоллаххытына, лаваш хаппатын туһугар бэлэмнээбит чебуректаргытын пакекка ууран иһиэххитин сөп.

Хобордооҕу арыынан сотон ититэбит, онтон чебуректарбытын эргитэ сылдьан саһарчы буһарабыт. Тута сииргэ лаваш хачыгырас буолар. Онтон сойуттахха, сытыара түһэрдэххэ, сымнаан хаалар.

Лаваштан маннык чебуректары эрдэ бэлэмнээн, астыах эрэ иннинэ таһааран ыһаарылыыр курдук, тоҥорон хаһааныахха сөп.

Сыырдаах маффиннар

Туох наадата:

- кытаанах сыыр – 110 г;

- кефир – 125 мл;

- сымыыт – 1 уст.;

- бурдук – 150 г;

- разрыхлитель – 1 ч.нь.;

- туус – бэйэ сөбүлүүрүнэн;

- укуруоп – 1 ост.нь.

Астааһына:

Сымыыты венчигинэн үллүөр диэри булкуйабыт, туус табыгынатабыт, кефир кутан, өссө үчүгэйдик булкуйабыт.

Сыыры түөркэлиибит. Укуруобу сууйан, куурдан баран бытархай гына кырбыыбыт. Сымыыппытыгар түөрэкэлэммит сыыры уонна укуруобу эбэн, үчүгэйдик булкуйабыт.

Бурдугу разрыхлители кытта туспа сиидэлиибит. Онон тиэстэбитигэр кыралаан кутан булкуйабыт. Барыта биир кэлим маасса буолуохтаах. Арыый хойуу соҕус тиэстэ тахсыахтаах.

Маффиннарбытын силикон киэптэргэ 2/3 гына ньуосканан кутабыт. Итии духуопкаҕа быһа холоон 30 мүн. буһарабыт.

Сонуннар

Ордук ааҕаллар

Замполит Александр:  «Эр санаалаах боотурдары төрөтөр Саха сиригэр сүгүрүйэбин»
Дьон | 12.07.2024 | 12:00
Замполит Александр: «Эр санаалаах боотурдары төрөтөр Саха сиригэр сүгүрүйэбин»
Бу сурук кэлбитин туһунан миэхэ Уус Алдан улууһун социальнай политика салаатын үлэһитэ, хаһыаппар сырдаппыт, анал байыаннай дьайыы саҕаланыаҕыттан үлэлии сылдьар Наталья Охлопкова от ыйын 3 күнүгэр эрийэн, хаһыаккар таһаарыаҥ дуо диэбитин тута сөбүлэспитим. Онон, сурук хайдах баарынан тылбаастаан, ааҕааччыларбар тиэрдиэм, Саха сирэ дьоруойдарын билиэхтээх!   “Наталья, дорообо! Мин аатым Александр. Мин...
Истиҥник санаан
Дьон | 05.07.2024 | 20:38
Истиҥник санаан
(Учууталбар Раиса Реасовна Кулаковскаяҕа ананар)
Светлана Дьяконова: «Саҥаттан ыал буолан эрэр курдукпут...»
Дьон | 04.07.2024 | 16:00
Светлана Дьяконова: «Саҥаттан ыал буолан эрэр курдукпут...»
Быйылгы халаан Хатырык нэһилиэнньэлээх пуунун олох үөйбэтэх өттүттэн ылан, олохтоохтору ууга-уокка түһэрбитин ааһан, уйулҕаларыгар да охсуу ыллылар, күн бүгүн ол содулун туоратыыга күүскэ үлэлииллэр, кэлэн ааспыт иэдээни оһоруналлар.   Светлана Васильевна Дьяконова, Хатырык олохтооҕо, биэнсийэлээх, култуура эйгэтигэр 35 сыл үлэлээн, “Култуура туйгуна” бэлиэлээх үлэ бэтэрээнэ, бүгүн ааҕааччыларга халаан иэдээнин туһунан кэпсиир:...
Туймаада ыһыаҕын туһунан дьон санаата
Сонуннар | 04.07.2024 | 14:00
Туймаада ыһыаҕын туһунан дьон санаата
Туймаада ыһыаҕа ыһыллар Үс Хатыҥ сирэ-уота куорат кииниттэн төһө да ыраах турдар, норуот уустук айаны, араас мэһэйдэри аахсыбакка, бииргэ мустар үөрүүтүн билээри, алгыс баһын сыалаары, кэлэр сылга күүс эбинээри, быйыл номнуо үйэ чиэппэриттэн ордук саараабакка дьулуһар. Быйылгы ыһыах тэрээһинин туһунан норуот санаатын билсээри, ыйынньыктарынан сирдэтэн, түһүлгэлэринэн хаамтыбыт.   Бастатан туран, оптуобус....