Өрөбүллэргэ ханна барабыт?

Уһун унньуктаах кыһын кэнниттэн Саха сирин олохтоохторо таһырдьа талаһабыт. Күн уһаан, халлаан сылыйан, киһи эрэ салгыҥҥа сылдьыан, оонньуон-көрүлүөн, өрөбүллэрин уратытык атаарыан баҕарар.   
Бүгүҥҥү нүөмэрбитигэр дьыл бу кэмигэр киин куорат олохтоохторо  сөбүлээн сынньанар сирдэрин испииһэктээтибит. Онно хайдах тиийиллэрин, ханнык өҥөлөр баалларын, сыаналарын, кимиэхэ чэпчэтии көрүллэрин үөрэттибит. Эрдэ быһа түһэн эттэххэ, бу угуйук буолбатах, ааҕааччыларбыт туһанныннар диэн кыһалынныбыт.

«Өлүөнэ очуостара» айылҕа паарката, Хаҥалас

Билигин суол үчүгэй кэмэ, онон барыы-кэлии үгүс. Дьокуускайтан массыынанан, таксинан эбэтэр оптуобуһунан тиийиллэр.

Кулун тутар ыйтан хас чэппиэр уонна субуота ахсын Автовокзалтан оптуобустар сылдьаллар. Дьокуускайтан сарсыарда 11 чаастан туруналлар; куоракка төннүү –  киэһэ 19.30 ч. Манна даҕатан эттэххэ, Айылҕа пааркатын, СӨ Урбааҥҥа, атыыга-эргиэҥҥэ уонна туризмҥа министиэристибэтин, Туризм сайдыытын уонна территориальнай маркетинг агентствотын уонна Дьокуускай куораттааҕы Автовокзал кыттыгас бырайыактара. 

Биллэриигэ көрдөххө, айан сыаната 4000 солк. диэн (манна гид өҥөтө киирэр). Ол эрээри саайтка тоҕо эрэ 4200 солк. диэн таһаарар.  Каассаҕа тиийэн эбэтэр Автовокзал саайтын нөҥүө ылыахха сөп диэбиттэр.

Маны таһынан, таксилар төһөҕө илдьэллэрин анал сыһыарыыга киирэн үөрэттибит. Сыаналара 3000-3500 солк. халбаҥныыр. Сорох улахан массыыналар кэлэктииптэртэн сайаапкалары ылабыт диэбиттэр. Эрдэттэн эрийэн, барар күҥҥүтүн болдьоһуҥ диэн сүбэлиибит.

Айылҕа пааркатыгар киирии билиэт сыаната – 700 солк., биэнсийэлээхтэргэ уонна 17-гэр диэри саастаах оҕолорго – 300 солк. Бэтэрээннэргэ босхо.

Билсэр төл.: +7(4112) 31-86-21

Эбэн эттэххэ, айылҕа пааркатыгар сылдьааччы ахсаана сыл аайы элбии турар. Холобур, былырыын бу кэрэ-бэлиэ сиргэ 42 тыһыынча киһи ыалдьыттаабыт. Быйыл 2 600 уһуннаах саҥа экология ыллыга арыллыбыт, онон үөһэ тахсарга быдан табыгастаах буолбут.

«Доҕордоһуу» түмэл, Суотту, Уус Алдан

Массыынанан эбэтэр таксинан эрэ тиийиллэр. Дьиэ кэргэнинэн эбэтэр доҕоттору кытта сынньанарга, иллэҥ кэми сырылаан, оонньоон-көрүлээн атаарарга үчүгэй. Баҕалаах дьоҥҥо экскурсия ыытыллар.

Киирии билиэт – 300 солк., оҕолорго – 200 солк.

Сарсыарда 10.00 чаастан киэһэ 18.00 чааска диэри үлэлиир, бэнидиэнньиккэ өрүүллэр.

Билсэр төл.: 8-914-223-50-29

«Северное сияние» муус куорат, Дьокуускай

202-с дьоҕус түөлбэҕэ баар. 17, 7 уонна 3 №-дээх оптуобустарынан тиийиэххэ сөп, тохтобултан хаамыылаах соҕус. Быйыл сыаналарын наһаа үрдэппиттэр диэн кэпсэтии баара, ол эрээри сылдьааччы ахсаана аҕыйаабатахха дылы.  

Дьиктитэ диэн, билиэт сыаната оҕо төһө үрдүгүттэн тутулуктаах. 140 см үөһэ ыалдьыттарга – 600 солк., чэпчэтиилээх билиэт – 400 солк.; 107 см үөһэ оҕолорго – 400 солк., чэпчэтиилээх билиэт – 300 солк. Чэпчэтии элбэх оҕолоох дьиэ кэргэттэргэ, АБДь кытыылаахтарын дьиэ кэргэттэригэр, инбэлииттэргэ көрүллэр. Төрөөбүт күннээхтэргэ, тулаайах оҕолорго – босхо.

Маны таһынан, араас аахсыйалар бааллар. Холобур, бэнидиэнньиктэн бээтинсэҕэ диэри биэнсийэлээхтэргэ уонна устудьуоннарга – 400 солк. Эбэтэр 10-тан элбэх оскуола үөрэнээччитин арыаллыыр улахан киһи босхо киирэр.

20-тэн элбэх киһилээх кэлэктииптэргэ киирии билиэт чэпчэтиилээх – 400 солк.

Сыыртан түһүүттэн уонна катоктан ураты көр-нар барыта төлөбүрдээх.  Бэйэҕитигэр суох буоллаҕына, хаҥкы (1 чаас), тюбинг (30 мүн.) уларсыы – 300 солк., ледянка – 100 солк. Улахан хампаанньалар дьиэ куортамныахтарын сөп, ол эмиэ туспа төлөбүрдээх. Уопсайынан, харчы балачча хамсыыр сирэ. 

Ааҕааччыларга сүбэ:

Чэпчэтиилээх араҥаҕа киирэр буоллаххытына, хайаан да онуоха туһааннаах докумуоннаргытын уктан бараргытын умнумаҥ.

Аһаҕас халлаан анныгар саамай улахан каток

Сайсары күөлгэ баар. Иэнэ – 10 тыһ. кв. миэтэрэ, 2 тыһыынча киһи киирэр. Быйыл 200 миэтэрэ усталаах гирлянданы ыйаабыттар, онон киэһэ аайы күөл бу муннуга кэрэ көстүүлээх сиргэ кубулуйар.

Массыынанан, оптуобуһунан эбэтэр сатыы да тиийиллэр.

Хаҥкы уларсыы (1 ч.) – 300 солк. Бэйэҥ илдьэ кэллэххинэ, киирии – 200 солк., төһө баҕарар сылдьыахха сөп. Иттэр, аһыыр сир баар. 

Нэһилиэнньэ босхо хаҥкылаатын диэн

Сайсары управата телеграм ханаалыгар иһитиннэрбитинэн, Сайсары күөлгэ Лермонтов уул. диэкиттэн киириигэ уонна Билибин уул., 38, босхо катоктар арыллыбыттар.

«Төхтүр» спорт, сынньалаҥ комплекса, Хаҥалас

Массыынанан эбэтэр таксинан эрэ тиийиллэр. Күн аайы сарсыарда 10 чаастан киэһэ 19.00 чааска диэри үлэлиир.

Улахан дьоҥҥо – 250 солк., 5-тэн 14-гэр диэри саастаах оҕолорго – 150 солк. 5-гэр диэри саастаах оҕолор босхо киирэллэр. Элбэх оҕолоох ыалларга, инбэлииттэргэ уонна АБДь кыттыылаахтарыгар 50% чэпчэтиилээх.

Хаҥкы, сноуборд, хайыһар – көр-нар эгэлгэтэ элбэх. Төлөбүрэ туспа.

«Үрдэл» көхтөөх сынньалаҥ паарката, Дьокуускай

Куорат кииниттэн 15-20 мүнүүтэнэн тиийиэххэ сөп. Массыынанан, таксинан эбэтэр 18-с №-дээх оптуобуһунан («Карьер» тиһэх тохтобул). Уопсастыбаннай тырааныспартан түһэн баран, салгыы сатыы хаамаҕыт, арыый тэйиччи. Атахтара ыалдьар дьон мырааны өрө дабайаллара ыарахан соҕус, ону өйдөөҥ.

Сыыртан түһүү үлэ күннэригэр – 500 солк., өрөбүллэргэ – 700 солк. Тюбинг уонна ледянка уларсыы сыаната онно киирэр, бириэмэтэ хааччаҕа суох.

Билсэр төл.: 8-924-177-77-65

«Орто Дойду» зоопаарка, Хаҥалас

Тимир көлөлөөх дьон быһа холоон 40 мүнүүтэнэн холкутук тиийэллэр. Автовокзалтан 201-с №-дээх маршрут сылдьар, саайтка көрдөххө, билиэт сыаната – 145 солк. Маны сэргэ, таксинан барыахха сөп.

Күн уһаан, зоопаарка үлэлиир бириэмэтэ уларыйбыт. Бэнидиэнньик-баскыһыанньа сарсыарда 10.00 чаастан киэһэ 17.00 чааска диэри аһаҕас (каасса 16.30 ч. сабыллар).

Өрөбүллэрэ суох, ол эрээри ый бүтэһик бэнидиэнньигэр зоопааркаҕа санитарнай күн биллэриллэр. Оттон террариумҥа – хас бэнидиэнньик ахсын.

Киирии билиэт сыаната улахан киһиэхэ – 400 солк., оҕоҕо – 350 солк., биэнсийэлээхтэргэ – 300 солк. 5-гэр диэри саастаах оҕолорго, 1-кы, 2-с группалаах инбэлииттэргэ, тулаайах оҕолорго, бойобуой дьайыы бэтэрээннэригэр – босхо. Бөлөҕүнэн сылдьарга сайаапкалары эрдэттэн биэрэр ордук.  

Билсэр төл.: 8-914-270-63-56

«Вираж» хайыһар баазата

Бүлүүлүүр аартыкка, Чочур Мыраан тэллэҕэр баар. Спорт кыһыҥҥы көрүҥнэринэн сөбүлээн дьарыктанар дьоҥҥо аналлаах.

Массыынанан, таксинан эбэтэр 7 №-дээх оптуобуһунан тиийиллэр. Сарсыарда 9.00 чаастан түүн 24.00 чааска диэри үлэлиир.

Хайыһар эбэтэр сноуборд уларсыы биир чааһа – 500 солк. (күнү быһа сылдьарга – 2000 солк.), киирии иһин эбии төлөөбөккүт. Бэйэ хайыһардаах, сноубордаах буоллахха, киирии билиэт – 250 солк. Оҕолорго (35-с кээмэйгэ диэри) биир чааһа – 400 солк. эбэтэр күнү быһа уларсыы – 1500 солк. Эбии төлөөн, ачыкы, шлем уларсыахха сөп.

Билсэр төл.: 8-914-271-78-80

***

Саас – сырылыырга, хаҥкылыырга, хайыһардаан дайарга бэртээхэй кэм! Сотору хаарбыт, мууспут ууллуоҕа. Онон бу үтүө кэми мүччү туппакка, салгыҥҥа элбэхтик сылдьыахха.

Хаартыскалар: ааптар тус архыыбыттан уонна официальнай саайтартан