Өрөбүлгэ халлаан сылыйара күүтүллэр

Саха сирин олохтоохторо бары даҕаны сылаас күннэри, сааһы кэтэһэн эрэбит. Бүгүн түннүгү арыйаат туманнаах сарсыарданы көрөн, элбэх киһи санаата түспүт буолуохтаах. Ону бэҕэһээ тымныыбыт муоһа тостон силбиэтэнэр диэн уоскуйабыт. Аанньа буолуо дуо, муоскун тоһутан сиргэ быраҕаллара, ыарыыланар, кыыһырар буоллаҕа дии. Ол оннугар, улахан тымныыларбыт дьэ намыраан, сыыйа сааспыт кэлэн иһиэ турдаҕа.

Бу өрөбүллэргэ Дьокуускай олохтоохторун күн-дьыл туруга үөрдүө, санааларын көтөҕүө.

Субуота

«Яндекс Погода» иһитиннэрбитинэн, субуотаҕа күнүскү кыраадыс -27, түүнүн -31 диэри тымныйыа. Күммүт тыгарын кэтэспэппит. Мөлтөх тыаллаах, сөкүүндэҕэ 1-тэн 3 миэтирэҕэ диэри үрүө. Сөҥүү түспэт.

Баскыһыанньа

Өрөбүл күн быдан сылыйыа. «Яндекс Погода» күнүһүн -25 кыраадыс, түүнүн -30 тымныйар диэн иһитиннэрэр, маныаха киэһэни быһа уонна түүн кыратык хаардыыра күүтүллэр. «Гисметео» этэринэн, мөлтөх тыаллаах, сөкүүндэҕэ 1-тэн 3 миэтирэҕэ диэри.