Путин нуучча тылын факультеттарын тэрийэргэ этии киллэрдэ

Билигин үгүс үрдүк үөрэх кыһаларыгар нуучча филологиятын факультеттара суох, кини ньиэмэс уонна англия филологияларын кытта биир факультекка киирэллэр. Путин бэлиэтээбитинэн, бу нуучча тылын аныгы Арассыыйа биир сүрүн баайынан ааҕар өйдөбүлгэ сөп түбэспэт.

Үтүө холобурунан Крым федеральнай университета буолар, былырыын манна Нуучча тылын уонна литературатын туспа факультета арыллыбыта. Бэрэсидьиэн атын федеральнай үөрэхтэр Крым холобурун батыһыахтара диэн эрэнэр.

Маны таһынан, Путин алын кылаас учууталларын бэлэмнээһиҥҥэ нуучча тылын уонна литературатын үөрэтии чааһын элбэтэргэ этии киллэрдэ. Бу предметтэр педагогтар уопсай тылларын култууратын уонна эстетическэй көрүүлэрин оҥкулун оҥороллор, оҕолору иитиигэ быһаччы дьайаллар.

Бэрэсидьиэн оҕо чэбдигирдэр лааҕырдарыгар нуучча тылыгар уонна литературатыгар анаммыт тематическай симиэнэлэри тэрийэргэ ыҥырда. Кини Үөрэҕирии министиэристибэтиттэн уонна Арассыыйатааҕы Ыччат сойууһуттан бу идиэйэни олоххо киллэриигэ кыттарга көрдөстө.