Путин дьиэ кэргэн ипотекатын кэҥэтиини ирдээтэ: ханнык дьиэ Арассыыйа олохтоохторугар табыгастаах буолуой?

Арассыыйа бэрэсидьиэнэ Владимир Путин дьиэ кэргэн ипотекатын бырагырааматын кэҥэтэр туһунан бырабыыталыстыбаҕа сорудахтаата. Аҕыйах тутуулаах куораттарга ол 20-тэн үөһэ саастаах элбэх кыбартыыралаах дьиэлэргэ сыһыаннаах буолуоҕа. Кремль иһитиннэрбитинэн, дойду баһылыга ахсынньыга буолбут ”Сыл түмүктэрэ” конференция кэнниттэн бу дьаһалы таһаарбыт.

“Элбэх оҕолоох дьиэ кэргэттэри өйүүр сыалтан 20-тэн тахса сыллааҕыта тутуллубут элбэх кыбартыыралаах дьиэлэргэ баар иккис дьиэ (вторичнай) ырыынагар элбэх оҕолоох дьиэ кэргэттэр олорор дьиэлэри ылыахтарын сөбүн учуоттаан, оҕолоох дьиэ кэргэттэргэ чэпчэтиилээх ипотека бырагырааматын болдьоҕун уларытар туһунан этиилэри киллэриҥ”, — диэн дьаһалга этиллэр.

Санатан эттэххэ, дьиэ кэргэн ипотекатын Арассыыйа гражданнара 6 сааһыгар диэри оҕолоохтор, инбэлиит оҕолоохтор эбэтэр сокуоннай саастарын туола илик икки оҕолоохтор ылыахтарын сөп. Бу ипотеканы саҥа дьиэҕэ эбэтэр 20 сылтан аҕа буолбатах элбэх кыбартыыралаах дьиэҕэ дьиэ-уот атыылаһарга туһаныахха сөп.

Бастакы төлөбүр дьиэ сыанатыттан аччаабыта 20% буолар, Москва, Санкт-Петербург, Москва уонна Ленинград уобаластарыгар саамай улааппыта – 12 мөлүйүөн солкуобай. Арассыыйа атын эрэгийиэннэрин олохтоохторо 6 мөлүйүөн солкуобайга диэри кирэдьиити ылыахтарын сөп. 6%-наах  кирэдьиит болдьоҕун тухары хаалар — 30 сылга диэри.

Бырабыыталыстыба ыйдааҕы оҕо көрүүтүгэр төлөнөр босуобуйаны балтараа сааһыттан үс сылга диэри уһатыы боппуруоһун эмиэ көрүөхтээх.

Салгыы, бэрэсидьиэн оҕолоох ыалларга социальнай өйөбүл миэрэлэрин тупсарыы барыйааннарын оҥорорго сорудахтаата:

“Төрөппүттэр үлэлээх буолалларын көҕүлүүр уонна үлэттэн дохуоттарын үрдэтэр сыалтан”, — диэн Кремль саайтыгар бэлиэтэнэр.

Санатар буоллахха, олунньу 1 күнүттэн дьиэ кэргэн ипотекатын усулуобуйата уларыйда. Билигин дьиэ кэргэҥҥэ биир эрэ чэпчэтиилээх кирэдьиит бэриллэр. Урут дьиэ кэргэн ипотекатыгар кэргэнниилэр тус-туспа сайабылыанньа биэриэхтэрин сөп этэ.