«Пушкин каартатын» туһанаҕын дуу?

Биһиги дойду эдэр дьонугар «Пушкин каартата» диэн бэртээхэй өйөбүл баар буолбута быданнаата да, сорохтор күн баччатыгар диэри туһаммакка сылдьаллара баар эбит.

Дьиҥинэн, итинник каартаны ылан, киинэҕэ-тыйаатырга биитэр мусуойга босхо сылдьыы – туох да ааттаах үчүгэй эбээт. Итинник каартаны 14 сааһыттан 22 сааһыгар диэри эдэр дьон ылар бырааптаахтар. Бу каарта иһигэр 5 тыһ. солк. буолар! Хас сыл аайы ылан туһанар кыах баар. Ити 5 тыһ. солкуобайтан 2 тыһ. солк. киинэ билиэтин оннугар туһаныахха сөп гыммыттара. Дьэ, бу буор босхо бэриллэр абыраллаах каартаны хайдах ылыахха сөбүй?

Госуслуги порталыгар регистрацияланаҕын.

2 «Учетнай запиһы» бигэргэттэрэҕин.

3. Суотабайгар биитэр ноутбуккар «Госуслуги.Культура» сыһыарыыны хачайдыыгын.

4. Онно суруллубуту барытын толорбутуҥ кэннэ виртуальнай биитэр пластик «Пушкин каартатын» аныыллар.

Хайдах туһанылларый?

Сыһыарыы көмөтүнэн афишаҕа киирэн, сылдьыаххын баҕарар тэрээһиҥҥин, киинэҕин булаҕын эбэтэр быһа Культура.РФ. порталга киирэҕин. Онно «Пушкин каартатынан» төлүүбүн диэни баттыыгын (Тугу баттыахтааҕыҥ, толоруохтааҕыҥ барыта тахсан иһиэҕэ). Эбэтэр тэрээһин билиэтин атыылыыр каассаҕа сирэй тиийэн, эбэтэр тэрээһини ыытааччылар саайтарын нөҥүө атыылаһыахха эмиэ сөп. Киинэҕэ, тыйаатырга киирэргэр, ол билиэккин уонна пааспаргын көрдөрөҕүн.

Үгэс курдук, култуура тэрээһиннэрин биллэриитигэр «Пушкин каартата дьайар» биитэр «Пушкин каартатынан киириэххэ сөп диэн» эбии быһаарыылаах буолар.

Сорохтор ол каартам 5 тыһ. солк. босуобуйа ыларбар, дьиэ кэргэн дохуотун ааҕан таһааралларыгар дьайыа, онтум эбиллэн, олох да «кыахтаахха» киирсэн, ылар көмөбүттэн матыам диэн дьаарханан, тиэтэйбэттэр. Ону баара, бу каарта үбэ тус да, дьиэ кэргэн да дохуотугар ааҕыллыбат, көмө ананыытыгар ончу сыһыана суох.

Ити каартаны тус анаммыт киһитэ эрэ туһанар бырааптаах. Атын киһи туһанара билиннэҕинэ, каартаны блокировкалыыллар. Үсүһүнэн, харчыны киинэ-тыйаатыр гыныам оннугар харчынан ылыам этэ диир буоллаххына, сыыһаҕын. Харчынан солбуллубат. Түөкүттэр ити каартаҕа харахтарын хатаан, сымыйанан, «каарта оннугар харчыга атастаһыннаран биэриэхпит» диэн, албыҥҥа үктэтэ сатыыр буолбуттар, сэрэниэххэ наада. Көстөн турар албын буолар.