Психологтар СВО кыттыылаахтарыгар уонна чугас дьонноругар өссө 800 сүбэни-аманы биэрдилэр

Үлэ ааспыт нэдиэлэҕэ өрөспүүбүлүкэ иһигэр да, тас да өттүгэр (Ростов-на-Дону госпиталларыгар) ыытылынна. Манна биирдиилээн уонна бөлөҕүнэн үлэлээтилэр. Барыта анал байыаннай дьайыы 680-тан тахса кыттааччыта уонна кинилэр дьиэ кэргэттэрэ хабылынна.

Өрөспүүбүлүкэтээҕи уйулҕа киинин дириэктэрэ Владимир Скрябин олунньу 27 күнүнээҕи брифиҥҥэ  иһитиннэрбитинэн, бастакытын уонна хаттаан сүбэ-ама, ону таһынан дьарыктар ыытыллыбыттар.

Ростов-на-Дону госпиталыгар уйулҕа идэлээхтэр биригээдэлэрэ бу күннэргэ айаннаабыт. Дьокуускайга дьарыктар ийэлэргэ тиһигин быспакка бараллар, оройуоннарга байыастар төрөппүттэригэр уонна оҕолоругар өйөбүл бөлөхтөрө үлэлииллэр. Маны таһынан анал байыаннай дьайыы кыттыылаахтарын ЯРПЦ (Якутский республиканский психологический центр) ханнык баҕарар филиалыгар быһаччы ылаллар. Бу туһунан Владимир Скрябин кэпсиир.

Дьокуускайга психолог көмөтүн, ону тэҥэ киин оройуоннарга баар салаалар тустарынан 8 (4112) 31-91-09 нүөмэргэ үлэ кэмигэр эрийэн иһитиннэрии ылыахха сөп. Өссө суукка устата үлэлиир көмө линията баар: 8-800-100-35-50 эбэтэр 122, салгыы 6 уонна 2 сыыппараны баттыыгыт. Психологтарга эрийии анонимнай уонна конфиденциальнай, СВО эрэ хайысхатынан буолбатах. Атын аатынан суруйтарыахха эмиэ сөп. Көмө барыта босхо оҥоһуллар.