Прокуратура уонна Арассыыйа Баана сэрэтэллэр: түөкүттэр сиэртибэлэрэ буолбат туһугар тугу гыныахха

РФ Генеральнай прокуратурата Арассыыйа Баанын кытта холбоһон, түөкүттэргэ утарылаһар ньымалар тустарынан нэһилиэнньэ билиитин-көрүүтүн таһымын үрдэтэргэ туһуламмыт сыыппара былакааттары оҥордулар. Биэдэмистибэ бэлэмнээбит өйдөбүнньүгэр биллибэт нүөмэрдэртэн саарбах эрийиилэр кэмнэригэр быһыыны-майгыны тутуһар судургу уонна чуолкай быраабылалар бааллар:

· төлөпүөнү тута ууран кэбиһиҥ;

· эрийбит киһи эппит тэрилтэтин официальнай төлөпүөнүгэр эрийиҥ;

· ылбыт иһитиннэриини итэҕэйимиэххэ сөп диэн сыаналааҥ уонна официальнай источниктарга бэрэбиэркэлээҥ;

· чугас дьоҥҥутун кытта сүбэлэһиҥ.

СӨ Прокуратурата өрөспүүбүлүкэ олохтоохторугар билбэт дьоҥҥутун кытта төлөпүөнүнэн кэпсэтэргитигэр болҕомтолоох уонна сэрэхтээх буоларгытыгар көрдөһөр. Өйдөөҥ: түөкүттэр бэйэлэрин бааннар, быраабы араҥаччылыыр уорганнар, социальнай пуондалар уонна да атын тэрилтэлэр үлэһиттэрин курдук кэпсиэхтэрин сөп. Иһитиннэриини бэрэбиэркэлиир соҕотох ньыма — тэрилтэ официальнай нүөмэригэр эрийии.

Өрөспүүбүлүкэ олохтоохторо бу өйдөбүнньүгү кытта билсиҥ уонна ордук түөкүттэр дьайыыларыгар киирэн биэрэр саастаах аймахтаргытыгар, билэр дьоҥҥутугар тарҕатыҥ. Бэйэҕитин уонна мунньубут үпкүтүн харыстааҥ!

СӨ Прокуратуратын иһитиннэриитинэн.