Прокуратура иһитиннэрэр

Доруобуйаҕа ыар хоромньуну оҥоруу иһин сууттаныа

Прокуратура эрдэ сууттана сылдьыбыт 1968 с. т. куорат олохтооҕун РФ ХК 111 ыст. 2 ч. «з» п. (киһи доруобуйатыгар ыар хоромньуну соруйан оҥорууга) буруйдуур холуобунай дьыалатын бигэргэттэ.

Силиэстийэ көрдөрөрүнэн, 2025 с. балаҕан ыйын 8 күнүгэр өрөспүүбүлүкэтээҕи «Е.Н. Андреев аатынан НПЦ – Фтизиатрия» ГБУ пациеннарын икки ардыгар иирсээн тахсыбыт. Ол түмүгэр балыыһа көрүдүөрүгэр итирик туруктаах сылдьыбыт буруйданааччы эмсэҕэлээччини иһин туһаайыытынан биирдэ быһаҕынан аспыт, инньэ гынан доруобуйатыгар ыар хоромньуну оҥорбут.

«Якутское» СУ силиэстийэлээбит бу холуобунай дьыалатын прокурор суут көрүүтүгэр утаарда. Буруйданааччы эр киһи 10 сылга диэри көҥүлэ быһыллыан сөп.

Оттон туһааннаах доруобуйа харыстабылын тэрилтэтигэр, буруй оҥоһуллуутугар тириэрдибит төрүөтү уонна усулуобуйаны туоратар сыаллаах, РФ УПК 158 ыст. бэрээдэгинэн көрдөбүл түһэрилиннэ. 

Массыынаны күрэтиигэ буруйданна

Дьокуускай куорат олохтооҕо РФ ХК 166 ыст. 1 ч. (тырааныспары күрэтиигэ) буруйданна.

Бастааҥҥы силиэстийэ көрдөрбүтүнэн, буруйданааччы 2025 с. алтынньы саҕаланыыта, билэр киһитин кыбартыыратыгар итирдэр утаҕы иһэн баран, таһырдьа тахсан Ново-Карьерная уул. баар элбэх кыбартыыралаах дьиэ тиэргэнигэр турар «Хонда Фит»  массыынаны күрэтэн дьиэтигэр тиийбит, күрэппит массыынатын Марха түөлбэтигэр баар стоянкаҕа хаалларбыт.

Холуобунай дьыала суут көрүүтүгэр утаарылынна. Буруйданааччы эр киһи 5 сылга диэри көҥүлэ быһыллыан сөп.

Ыар эмсэҕэлээһини оҥорон өлүүгэ тиэрдиигэ буруйданна

Прокуратура Дьокуускай олохтооҕун РФ ХК 111 ыст. 4 ч. (киһи доруобуйатыгар ыар эмсэҕэлээһини соруйан оҥорон, сэрэҕэ суохтан өлүүгэ тиэрдиигэ) буруйдуур холуобунай дьыаланы бигэргэттэ.

Силиэстийэ кэпсииринэн, буруйданааччы 2025 с. балаҕан ыйын 17 күнүгэр билэр киһитин кыбартыыратыгар бииргэ арыгылааһын кэмигэр абааһы көрсүү тахсыбытыттан, эмсэҕэлээччигэ илиитинэн, атаҕынан түспүт. Эмсэҕэлээччи ылбыт эт-хаан ыар эчэйиилэриттэн тыына быстыбыт.

Буруйданааччы силиэстийэ кэмигэр буруйун толору билиммит.

Холуобунай дьыала суут көрүүтүгэр утаарылынна.

Суоппар бырааба суох массыына ыытан иккитэ тутуллубут

Судаарыстыбаннай буруйдааччы Бүлүү оройуонуттан төрүттээх эр киһини РФ ХК 264.3 ыст. 1 ч. (тырааныспары ыытар бырааба суох массыынаны ыытыы) буруйдааһынын прокуратура өйөөтө.

Суут кэмигэр быһаарыллыбытынан, сууттанааччы бу иннинэ массыынаны итирик туруктаах ыытан РФ КоАП 12.8 ыст. 1 ч. административнай эппиэтинэскэ тардыллыбыт, массыынаны ыытар бырааба быһыллыбыт.

Оттон 2025 с. бэс ыйыгар массыынаны суоппар бырааба суох ыытан РФ КоАП 12.7 ыст. 4 ч. административнай эппиэтинэскэ тардыллыбыт. Ол кэннэ аны бу сыл от ыйыгар бырааба суох «Toyota Allion» мааркалаах массыына уруулугар олорбут.

Суут судаарыстыбаннай буруйдааччы санаатын учуоттаан, сууттанааччыны 200 чаас булгуччулаах үлэҕэ уураахтаата, тырааныспары ыытыыга сыһыаннаах үлэҕэ быраабын 1 сыл 10 ый болдьоххо быста.

Бириигэбэр сокуоннай күүһүгэр киирэ илик.

Иккистээн итирик туруктаах уруулга олорон көлөтө конфискацияланна

Дьокуускай куорат олохтооҕо 35 саастаах кэрэ аҥаары РФ ХК 264.1 ыст. 1 ч. (массыынаны иккистээн итирик туруктаах ыытыы) буруйдаан сууттаатылар.

Суут кэмигэр быһаарыллыбытынан, 2025 с. атырдьах ыйыгар, бу иннинэ эмиэ массыынаны итирик туруктаах ыытан административнай эппиэтинэскэ тардылла сылдьыбыт буруйданааччы, «Toyota Ist» мааркалаах массыына уруулугар итирик туруктаах олорбут.

Суут судаарыстыбаннай буруйдааччы санаатын учуоттаан туран, дьахтары 160 чаас булгуччулаах үлэҕэ уураахтаата, 2 сыл болдьоххо тырааныспары ыытыыга сыһыаннаах үлэҕэ быраабын быста.

Оттон «Toyota Ist» мааркалаах массыынатын судаарыстыба суотугар конфискациялаата.

Суут бириигэбэрэ сокуоннай күүһүгэр киирэ илик.

Аҕам саастаах дьонтон харчыны уорууга буруйданна

Дьокуускайга аҕам саастаах дьону албыннаан харчыларын уорууга буруйдуур холуобунай дьыаланы прокуратура суут көрүүтүгэр ыытта. 

Ол курдук, 2006 с. т. Дьокуускай олохтооҕо РФ ХК 159 ыст. 4 ч. (тэриллиилээх бөлөҕүнэн бөдөҥ уонна улахан кээмэйдээх түөкүннээһиҥҥэ) буруйданна.

Силиэстийэ көрдөрөрүнэн, буруйданааччы мессенджер нөҥүө түргэнник харчы өлөрөр ньыманы булбут. Силиэстийэ кэмигэр кимэ быһаарыллыбатах «BRATIK» диэн никтээх сирэйи кытта суруйсан, «курьер» эбээһинэһин толоруох буолан, тэриллиилээх бөлөххө киирбит.

Тэриллиилээх бөлөх кыттыылаахтара эмсэҕэлээччилэргэ быраабы харыстыыр уорганнар бэрэстэбиитэллэрэ буолан тиийэн, чугас аймаххыт суол саахалын таһаарда диэн сымыйа иһитиннэриини тиэрдэллэр эбит.

Оттон буруйданааччы, мессенджеринэн эмсэҕэлээччилэр аадырыстарын ыыттахтарына, түөкүттэр угаайыларыгар киирэн биэрбит дьонтон баран харчыларын ылан банкоматтарынан тэрийээччилэргэ ыытара, уоруллубут харчыттан 5 %-тан кырата суох сууманы хамнас курдук ылара биллибит. 

Ити курдук ньыманан Дьокуускай куорат түөрт, 85-ттэн 91-гэр диэри саастаах, олохтооҕун угаайыларыгар киллэрэн, 1,6 мөл. солк. уорбуттар.

Буруйданааччы кинини буруйу оҥорор бөлөҕү тэрийээччилэр бутуурга киллэрбиттэрин ыйан туран, буруйун билиммэтэх.

Прокурор бу холуобунай дьыаланы бигэргэтэн суут көрүүтүгэр ыытта. Ону тэҥэ үс эмсэҕэлээччи интэриэһин көмүскээн, таһаарыллыбыт хоромньуларын төлөтөр туһунан ирдэбили түһэрдэ. Биир эмсэҕэлээччи аҕам саастаах өлбүтүнэн сибээстээн, кини бэрэстэбиитэлигэр юридическай көмө оҥоһуллубут.

Тэриллиилээх бөлөх атын кыттыылаахтарыгар сыһыаннаан туһунан холуобунай дьыала тэриллиэ.

Өлөрөргө соруммут дьыалатын суут көрүө

Прокуратура Дьокуускай куорат 1968 с. т. олохтооҕор РФ ХК 30 ыст. 3 ч. – 105 ыст. 1 ч. (өлөрөргө сорунууга) буруйдуур түмүгү таһаарда.

Силиэстийэ көрдөрбүтүнэн, буруйданааччы, түптээн олорор сирэ суох киһи, 2025 с. от ыйын 26 күнүгэр итирик туруктаах сылдьан оробуочайынан үлэлиир ритуальнай киинигэр хоно кэлбит. Манна кэлэн эмиэ итирик туруктаах сылдьар бииргэ үлэлиир киһитин кытта иирсибит уонна эмсэҕэлээччини көхсүгэр быһаҕынан сэттэтэ анньыбыт.

Буруйу оҥорооччу эмсэҕэлээччи өйүн сүтэрбитин өллө дии санаан, өһүөннээх санаатын ситиспит сиэринэн тохтообут. Кэнники эмсэҕэлээччигэ медицинскэй көмө оҥоһуллубут.

Холуобунай дьыала суут көрүүтүгэр утаарылынна.

Атын киһи аатыгар иккитэ кирэдьиит ылбыт

Дьокуускай куорат олохтооҕо РФ ХК 159 ыст. 3 ч. (бөдөҥ кээмэйдээх түөкүннээһиҥҥэ) иккитэ буруйу оҥорон сууттаныа.

Силиэстийэ көрдөрбүтүнэн, буруйданааччы мобильнай сибээс салонугар атыыһыттыы олорон, атыылаһааччы сөбүлэҥин ылбакка эрэ, кистээн кини пааспарын дааннайын туһанан сим картаны ылбыт.

Салгыы буруйданааччы бу килийиэн пааспарын дааннайын туһанан, били ылбыт сим картатыгар кэлэр СМС иһитиннэриилэринэн бигэргэтэн, баантан иккитэ, уопсайа 749 тыһ. солк. суумалаах кирэдьиити ылбыт.   

Прокурор бу холуобунай дьыаланы суут көрүүтүгэр утаарда.

Оҕо доруобуйатыгар хоромньуну оҥорон сууттаныа

Прокурор Ньурба оройуонуттан төрүттээх 61 саастаах суоппары РФ ХК 264 ыст. 1 ч. (суол уонна тырааныспары эксплуатациялааһын быраабылаларын кэһииттэн, сэрэҕэ суохтан киһи доруобуйатыгар ыар хоромньуну оҥорууга) буруйдуур холуобунай дьыаланы суут көрүүтүгэр утаарда.

Силиэстийэ көрдөрөрүнэн, буруйданааччы 2025 с. от ыйын 17 күнүгэр 13 ч. 06 мүн. 14 ч. 06 мүн. диэри кэмҥэ «Nissan Vanette» массыынаны ыыта сылдьан, Покровскайдыыр суолга баар дьиэлэр тастарыгар баар светофора суох суолу туоруур сиргэ сокуоннай сааһын туола илик сатыы сылдьааччыны түҥнэри көппүт.

Бу быһылаан түмүгэр эрдэҕэс оҕо доруобуйата улаханнык эмсэҕэлээбит.

Холуобунай дьыаланы салгыы суут көрүө.

Көмүс симэхтэри уоран тутулунна

Дьокуускайдааҕы прокуратура куорат олохтооҕун РФ ХК 158 ыст. 3 ч. «а», «в» п.п. (дьиэҕэ сокуоннайа суох киирэн бөдөҥ кээмэйдээх уорууга) буруйдуур холуобунай дьыаланы бигэргэттэ.

Силиэстийэ кэпсииринэн, буруйданааччы 2025 с. кулун тутар 19 күнүгэр киниэхэ хоно кэлбит дьахтартан дьиэтигэр ювелирнай оҥоһуктар баалларын билбит. Буруйданааччы хоноһото утуйбутун кэннэ кыбартыыратын күлүүһүн ылбыт уонна дьахтар кыбартыыратыгар сокуоннайа суох киирэн 352 тыһ. солк. суумалаах ювелирнай оҥоһуктардаах сейфэни уорбут.

Полиция үлэһиттэрэ уоруллубут симэхтэр ханна баалларын чопчулаабыттар, инньэ гынан силиэстийэ кэмигэр кыһыл көмүс сыапачыкалар, подвескалар, ытарҕалар, биһилэхтэр уонна үрүҥ көмүс оҥоһуктар эмсэҕэлээччигэ төннөрүллүбүттэр.

Холуобунай дьыаланы салгыы суут көрүө.