Прокуратура иһитиннэрэр

Дуогабар көтүрүлүннэ

Дьокуускай куорат прокуратурата 2-с группалаах инбэлиит дьахтар быраабын көмүскүүргэ киллэрбит үҥсүүтүнэн бэрэбиэркэлиир үлэни ыытта.

Бэрэбиэркэ быһаарбытынан, үҥсээччи физическэй сирэй быһыытынан моҥкуруут барбытын туһунан дьыалатын хаамыытын арыаллыылларыгар “ЮДЛ” хааччахтаммыт эппиэтинэстээх уопсастыбаны кытта дуогабар түһэрсибит. Ол эрээри бу уопсастыба дуогабар быһыытынан ылыммыт эбэһээтэлистибэтин толорботох.

Прокуратура дьахтар интэриэһин көмүскээн суукка үҥсүү түһэрбитин түмүгэр, суут дуогабары көтүрдэ. Хааччахтаммыт эппиэтинэстээх уопсастыбаны үҥсээччи өҥө иһин төлөөбүт харчытын, ону таһынан моральнай толуйууну, потребителлэр бырааптарын көмүскүүр сокуоҥҥа олоҕуран  ыстараабы – уопсайа 240 тыһ. солк. төлүүргэ уураахтаата. 

Күһэлэҥ эмтэниини барыа

Дьокуускай прокуратурата куорат олохтооҕор көбүтүллүбүт холуобунай дьыаланы суут көрүүтүгэр кытынна.

Суут кэмигэр быһаарыллыбытынан, буруйданааччы 2023 с. ахсынньытыгар оптуобус сылаас тохтобулугар туран, эмсэҕэлээччиттэн, “төлөпүөннэһэбин” диэн көрдөһөн, iPhone 11 смартфонун  уларсыбыт. Ол кэннэ саһар соруктаах куоппут.

Бу быһылаан кэннэ 2024 с. тохсунньутугар буруйданааччы эрэстэрээҥҥэ сылдьан, аны Redmi Note 12Pro смартфону уорбут.

Суут бу холуобунай дьыаланы көрөрүгэр буруйданааччы психиатрическай экспертиза түмүгүнэн холуобунай буруйдааныыттан босхолонно. Ол оннугар психиатрическай көмөнү оҥорор анал стационарнай тииптээх медицинскэй тэрилтэҕэ күһэлэҥ эмтэниини барарга ананна.

Холуобунай дьыала көрүлүннэ

63 саастаах Өлүөхүмэ оройуонун олохтооҕор РФ ХК 3 ч. 30-с ыст. – 1 ч. 105-с ыст. (өлөрөргө сорунуу) тэриллибит холуобунай дьыала көрүллүүтүгэр Дьокуускай прокуратурата үлэлэстэ.

Суут хаамыыта быһаарбытынан, 2024 с. ыам ыйыгар сууттанааччы, хотторуулаах өрүт этиитин сөбүлээбэккэ, тус абааһы көрүүттэн сылтаан, дьахтары куухуна быһаҕынан иккиттэн аҕыйаҕа суохтук түөскэ уонна искэ анньыбыт. Ол кэннэ буруйу оҥорбут сириттэн тэскилээбит.

Эмсэҕэлээччи дьахтар бэйэтин кыаҕынан суһал көмөнү ыҥырбыт. Кэмигэр медицинскэй көмө оҥоһуллубут буолан, буруйданааччы бу буруйу соруйан, эрдэттэн өлөрөр соруктаах оҥорбута тиһэҕэр тириэрдиллибэтэх.

Суут психиатрическай экспертизатын түмүгүнэн буруйданааччы эр киһи психика өттүнэн кэһиллиилээҕэ, инньэ гынан буруйу оҥорор кэмигэр бу быһыыта туохха тириэрдэрин, кутталлааҕын ситэн өйдөөбөтөҕө, бу балаһыанньаҕа бэйэни салайынар кыаҕа суоҕа быһаарыллыбыт. 

Суут, прокурор санаатын учуоттаан туран, эр киһини психиатрическай көмөнү оҥорор анал тииптээх медицинскэй тэрилтэҕэ күһэлэҥ эмтэниини ааһарга анаата.

1 мөл. солк. суумалаах моральнай хоромньуну толуйарга модьуйда

Дьокуускай куорат прокуратурата “Үлэ туһунан” сокуону тутуһууну бэрэбиэркэлээтэ.

2024 с. ыам ыйыгар эмсэҕэлээччи “Дьокуускайдааҕы оҥоһуу муустаах үрүттээх каток” эбийиэккэ тутууга үлэлээччи эбээһинэһин толоро сылдьан, үлэнэн хааччыйааччы сөптөөх миэрэни ылбатаҕыттан, үрдүктэн сууллубут. Бу быһылаан түмүгэр үлэһит доруобуйатыгар ыарахан эчэйиини ылбыт.

Прокуратура, эмсэҕэлээччи интэриэһин көмүскээн, үлэнэн хааччыйааччы моральнай хоромньуну толору төлүүрүгэр суукка ирдэбил түһэрэн турар. Бу ирдэбили суут толордо, буруйдаахха 1 мөл. солк. кээмэйдээх хоромньуну төлүүрүгэр уураахтаата.

Административнай эппиэтинэскэ тардылынна

Дьокуускай куорат прокуратуратын көҕүлээһининэн аахсыйалаах уопсастыба коррупционнай дьайыылары оҥоруу иһин административнай эппиэтинэскэ тардылынна.

Ол курдук, прокуратура судаарыстыбаннай сулууспаҕа үлэлии сылдьыбыт киһини үлэҕэ ылыыга коррупцияны утарар сокуону тутуһуу кэһиллиитэ баарын-суоҕун бэрэбиэркэлээтэ. Бэрэбиэркэ көрдөрөрүнэн, тэрилтэ федеральнай уорган территориальнай подразделениетыгар судаарыстыбаннай гражданскай сулууспа дуоһунаһыгар үлэлии сылдьыбыт киһини үлэҕэ ылбыт. Сокуон ирдэбилин аахсыбакка, үлэҕэ ылааччы сокуонунан бэриллэр кэм иһигэр саҥа үлэһит урукку үлэтигэр бу киһини кытта үлэ дуогабарын түһэрсибитин туһунан иһитиннэриини ыыппатах.

Куорат прокуратурата бу тэрилтэ административнай сокуону кэһиини оҥорбутугар РФ КоАП 19.29 ыст. (уруккута судаарыстыбаннай сулууспалааҕы үлэҕэ ылыыга сокуону кэһии) дьыаланы көбүттэ. Бу дьыаланы көрүү кэннэ суут туһааннаах тэрилтэни 100 тыһ.солк. ыстараабы төлүүргэ уураахтаата.

Уураах билиҥҥитэ сокуоннай күүһүгэр киирэ илик.

Управление 2024 сыл түмүгүнэн мунньаҕа буолла

Дьокуускай куорат прокурора Виктор Умеренко оперативнай сулууспа сыллааҕы үлэтин түмүктэрин ырытар сүбэ-мунньахха кыттыыны ылла.

Мунньахха “Якутское” МУ подразделениеларын салайааччыларын отчуоттарын иһиттилэр. Отчуоту ырытыһыы кэннэ прокурор быраабы араҥаччылыыр үлэ көдьүүһүн үрдэтэргэ, баар итэҕэстэри туоратар эбии миэрэлэри ыларга эттэ.

Ол курдук, 2024 с. Дьокуускай куоракка 7576 буруйу оҥоруу бэлиэтэммит (бу иннинээҕи көрдөрүүттэн 14,6%-нан үрдээһин баар). Буруйу оҥоруу таһыма 100 тыһ. нэһилиэнньэҕэ суоттааһынынан – 1909,5. 

Территорияларынан көрүүгэ бэлиэтэммитинэн: 1-кы №-дээх полиция отделыгар – 1931 буруйу оҥоруу, 2-с №-дээх полиция отделыгар – 1918, 3-с №-дээх полиция отделыгар – 1433, 4-с №-дээх полиция отделыгар – 1938, “Жатайское” ОП – 85.

2024 сылга Дьокуускай куоракка буруйу оҥоруу түмүгэр 76 киһи тыына быстыбыт, 160 киһи доруобуйатыгар ыарахан хоромньуну, эчэйиини ылбыт.

Иһитиннэрэр-телекоммуникационнай технологиялары туһанан буруйу оҥоруу – 2837, ону таһынан 385 экономическай уонна 110 коррупционнай хайысхалаах буруйу оҥоруу тахсыбыт.

Прокурор буруйу оҥоруу күн-түүн элбии турарынан сибээстээн ис дьыала уорганнара куорат иһигэр буруйу оҥорууну уонна быраабы кэһиини сэрэтэр үлэни күүһүрдэллэригэр, коррупцияны, экономическай уонна дуоһунаһы туһанан буруйу кэһии баарын булууга, тохтотууга уонна арыйыыга оперативнай сулууспа үлэтэ өссө көхтөөх буолара наадатын эттэ. 

Сүбэ-мунньах түмүгүнэн кэлэр кэм соруктарын ылыннылар.

Быраабы кэһиини бэрэбиэркэлээтилэр

Дьокуускай куорат Якутскай уулуссатын 6/2-гэр баар элбэх кыбартыыралаах дьиэ олохтоохторо бырааптарын толору туһаналларын суоҕун прокуратура бэрэбиэркэлээтэ.

Бүтүн Арассыыйатааҕы норуот фронун (ОНФ) регионнааҕы отделениета бу дьиэ олохтоохторо олорор усулуобуйаларын бэрэбиэркэлииргэ этии киллэрбит.

Аадырыска тиийэн бэрэбиэркэлиир үлэҕэ регионнааҕы ОНФ салайааччыта Дмитрий Паньков уонна “Дьокуускай куорат” куорат уокуругун баһылыгын солбуйааччы Владислав Слепцов кытыннылар.

Бу дьиэни ресурсанан хааччыйар тэрилтэлэр, салайар хампаанньа олохтоохтор бырааптарын төһө тутуһалларын, кэһиллии баарын туһунан иһитиннэриилэргэ миэрэлэри ылбыттарын-суоҕун бэрэбиэркэ түмүгэ быһаарыа.

Бэрэбиэркэ түмүгүнэн прокуратура өттүттэн сөптөөх миэрэ ылыллыа.