«Пригороды – городу» көҕөрдүү аахсыйата түмүктэннэ

Манна куорат кытыы нэһилиэктэрин дьаһалталара уонна олохтоохторо көхтөөхтүк кытыннылар.

Көҕөрдүү аахсыйатыгар чөмпүйүөннэринэн Табаҕа олохтоохторо (171 мас) буоллулар. Кинилэр кэннилэриттэн Кангалаас (142 мас) уонна Хатас (130 мас) олохтоохторо илин-кэлин түһүстүлэр.

Куорат баһылыга Дмитрий Садовников МАХ ханаалыгар бэлиэтээбитинэн, бу – уопсай кыайыы, биир даҕаны кытыы нэһилиэк туора турбата, бары сүүстэн тахса маһы олортулар. Кини аахсыйаҕа кыттыбыт дьоҥҥо махталын тиэртэ.

Аахсыйа түмүгүнэн кыайыылаахтарга 2 мөл. солк., иккис миэстэҕэ – 1 мөл. 700 тыһ. солк., үһүс миэстэҕэ – 1 мөл. 300 тыһ. солк. сертификаттары туттардылар.