Почта мааркатын күнэ

Сыыппара технологията олохпутугар күүскэ киирбитин да үрдүнэн, маарка почта өҥөтүн төлөбүрүн ньыматын быһыытынан билигин да хото туһаныллар. Маны тэҥэ маарка кэллиэксийэһиттэр саамай мунньар көрүҥнэрэ буолар.

Бырааһынньык күнүнэн Арассыыйа почтата Саха Өрөспүүбүлүкэтин бүттүүнүгэр маарканы төһө туһаналларын ааҕан-суоттаан көрбүт:

Сыллата Саха сирин олохтоохторо 1,1 мөл. стандартнай почта мааркатын сурук уонна баһыылка ыыталларыгар тутталлар эбит. Сурук ыыталларыгар килийиэннэр үксүн 10, 33, 76 солкуобайдаах мааркалары атыылаһаллар – 190 000 тахса атыыламмыт уонна аан дойдуну тилийэ тарҕаммыт.

Ону таһынан Саха сирин олохтоохторо ортотунан 8 000 художественнай маарканы чааһынай филателистическай кэллиэксийэлэрин байытаары анаан-минээн атыылаһаллар эбит. Маннык мааркаларга култуура диэйэтэллэрин, искусство айымньыларын, история артефактарын, түмэл экспонаттарын, уордьаннары, архитектурнай тутуулары, пааматынньыктары уонна судаарыстыба символларын бэчээттииллэр.