Почта мааркаларын уонна аккырыыккаларын ааптара буолуоххун сөп

«Арассыыйа почтата» бу сылга аналлаах мааркалар блогтарын уонна ааптардар аккырыыккаларын таһаарыаҕа. Ойуулары Бүтүн Арассыыйатааҕы аһаҕас куонкурус кыттыылаахтарын айар үлэлэриттэн талыахтара.

Куонкурус Арассыыйаҕа олорор бары омуктар уратыларын уонна үгэстэрин харыстааһыҥҥа, хардарыта ытыктабылы бөҕөргөтүүгэ уонна култуурунай араастаһыыны өйөөһүҥҥэ туһуланар.

Куонкуруска профессиональнай худуоһунньуктар уонна дизайнердар, ону тэҥэ 18 саастарын туолбут айар дьоҕурдаахтар, устудьуоннар уонна айар үөрэх кыһаларын выпускниктара кыттыахтарын сөп. Ол туһугар кинилэргэ Арассыыйа норуоттарын сомоҕолоһуутугар анаммыт почта блогун эбэтэр ааптар аккырыыккатын интэриэһинэй, чаҕылхай, өйгө хаалар эскииһин араас тиэхиньикэлэринэн: уруһуй, ааптар эбэтэр көмпүүтэр графиката, коллаж уонна да атын ньымаларынан оҥоруохха наада.

Сайаапканы биэрии уонна куонкурус үлэтин электроннай көрүҥүн ыам ыйын 31 күнүгэр диэри ыытаҕыт. Куонкурус түмүгүн бэс ыйын 10 күнүгэр диэри биллэриэхтэрэ. Түмүктүүр үлэлэргэ олоҕуран почта блога уонна биэс аккырыыкка оҥоһуллуоҕа.

Куонкурус балаһыанньатын манна көрүөххэ сөп:

https://rusmarka.ru/engine/files/editors/Polozhenie_Konkurs_2026_god_edinstva_narodov_Rossii.pdf

Сайаапканы биэрии:

https://forms.yandex.ru/u/69e8746584227c51a24101d7/

Бу туһунан “Арассыыйа почтата” АО иһитиннэрэр.