Пляж арылларга бэлэм

Куорат сөтүөлүүр сирэ арылларга бэлэм, онуоха туһааннаах тэрээһиннэр түмүктэннилэр. Лаборатория чинчийиилэрэ пляж кумаҕа уонна уута санитарнай нуормаҕа хоруйдуурун бигэргэттэ. Бу туһунан «Тэхиньиичэскэй көрүү-истии сулууспата» МУТ иһитиннэрэр.

Бэс ыйын 6 күнүгэр  Губинскай уокурук управата уонна 203-с түөлбэ Ыстаарысталарын сүбэтэ сөтүөлүүр сиргэ «Пляжпытын бииргэ тупсарыах» уопсастыбаннай аахсыйаны тэрийэн ыыттылар. Тэрээһиҥҥэ 202-с уонна 203-с түөлбэлэр олохтоохторо, уокурук управатыттан, 203-с түөлбэ баһаарынай-быыһыыр чааһыттан, «Качели» элбэх хайысхалаах комплекстан, Куорат Дууматын ыччат палаататыттан, «Биир ньыгыл Арассыыйа» Эдэр гвардиятыттан, уопсастыбаннай түмсүүлэртэн, Кыһыҥҥы харбааһын федерациятыттан, «Айыы Кыһата» оскуолаттан бэрэстэбиитэллэр уонна чааһынай урбаанньыттар – барыта 60 кэриҥэ киһи кытынна.

Аахсыйа түмүгүнэн 65 куул бөх уонна 10 куб. миэтэрэ бөдөҥ кээмэйдээх бөх хомулунна.

Маны сэргэ, сөтүөлүүр сир зонатын араарар бэлиэлэр, ууга сылдьыы быраабылатын санатар истиэндэлэр туруорулуннулар, дьоҥҥо куттал суох буолуутун хааччыйар бары усулуобуйа тэрилиннэ. Дьон сытан сынньанар, күҥҥэ сыламныыр сирдэрин бэлэмнээтилэр.

Быыһааччылар анал үөрэҕи аастылар. Билиҥҥи туругунан пляж сирин-уотун ыраастыыр волонтердары сүүмэрдээһин салҕанар.  

Куорат сөтүөлүүр сирэ бэс ыйын 9 күнүгэр арыллара күүтүллэр.

Хаартыска:  yakutskcity.ru сайт