Планерка сонуннара

Ааспыт нэдиэлэҕэ полиция салаатыгар араас быраабы кэһиилэринэн 285 киһи аҕалыллыбыт: 218 — уулуссаттан, 67 — уопсастыбаннай сирдэртэн.

Дьокуускайга арыгы бородууксуйатын атыылыыр быраабыланы кэһии 12 түбэлтэтэ тахсыбыта бэлиэтэммит. 118 лиитирэ испиирдээх утах былдьаммыт, административнай боротокуоллар толоруллубуттар. Ону сэргэ, Дьокуускай куорат Административнай хамыыһыйатыгар «ГринЛион» баарга РФ Административнай кодексатын 6.21 ыст. административнай буруйу оҥоруу туһунан боротокуол киирбит.

«Туймаада ыһыаҕа» тэрээһиннэригэр уопсастыбаннай бэрээдэги хааччыйыыга Үс Хатыҥ сиригэр бэс ыйын 27-28 күннэригэр ИДьМ 800 үлэһитэ тардыллыаҕа. Бэс ыйын 25 күнүттэн «Якутское» МУ МВД тус састааба күүһүрдүллүбүт эрэсиимҥэ көһөрүллүөҕэ.

Дьокуускайга 63 суол быһылаана бэлиэтэммит, онно 9 киһи эчэйии ылбыт. Суол быраабылатын 1315 түгэҥҥэ кэһии тахсыбыт, итирик туруктаах 63 суоппар тутуллубут, онтон 9-һа — хаттаан.

Дьокуускайга ТКО полигонугар киирэр бөх-сыыс ахсаана эбиллэр. Бу туһунан «Жилкомсервис» МУП дириэктэрэ Юрий Спиридонов иһитиннэрдэ. Биир нэдиэлэ иһигэр «Якутскэкосети» бөх тиэйэр массыыналара полигонҥа 15,7 тыһ. кубометр ТКО аҕалбыттар. Бу былырыыҥҥы кэмтэн 1 тыһ. кубометрынан элбэх. Тутуу бөҕө үрдээһинэ эмиэ бэлиэтэнэр: ааспыт сылга нэдиэлэҕэ 3,6 тыһ. кубометр аҕалыллар эбит буоллаҕына, быйыл — 3,9 тыһ. кубометр.