Пионерия күнүнэн Фатия Авдеева аатынан паарта арылынна

Ыам ыйын 19 күнүгэр бэлиэтэнэр Пионерия күнүгэр Дьокуускай куорат 7 №-дээх оскуолатыгар Саха сирин сүрүн пионер баһаатайа Фатия Иннокентьевна Авдееваҕа аналлаах «Үлэ киһитин паартата» арылынна.
Бэйэтин кэмин уһулуччулаах педагога, ыччат настаабынньыга, үөрэхтээһин уонна култуура эйгэлэрин үтүөлээх үлэһитэ, Дьокуускай куорат Бочуоттаах гражданина Фатия Иннокентьевна аатын билигин Оҕо айымньытын дьиэтэ сүгэр.
Дьокуускай куорат 7 №-дээх оскуолата «Үлэ киһитин паартатыгар» Фатия Иннокентьевна аатын иҥэрбитэ түбэһиэхчэ буолбатах. Бу оскуолаҕа кини эдэр сааһа, бастакы учууталлаабыт, пионер баһаатайдаабыт сыллара ааспыттара. 
Ф.И. Авдеева 1953 сылтан 2009 сылга диэри, үйэ аҥаарыттан ордук кэмҥэ, оччолорго Оҕо дыбарыаһын, кэлин Оҕо айымньытын дьиэтин салайан, кэнчээри ыччаты иитэр, айар дьоҕурун сайыннарар модун кэлэктиип, тэрилтэ акылаатын тэрийбитэ идэтигэр уһулуччу бэриниилээҕин, үрдүк педагогическай маастарыстыбатын туоһута. Эдэр учууталларга болҕомтолоох, кыһамньылаах сыһыана үйэлэргэ үтүө эрэ тылларынан ахтыллыаҕа.
«Үлэ киһитин паартатын» арыйыыга Дьокуускай куорат үөрэҕин управлениетын начаалынньыгын солбуйааччы Егор Охлопков, 7 №-дээх оскуола дириэктэрэ Ия Васильева, Ф.И. Авдеева аатынан Оҕо айымньытын дьиэтин дириэктэрэ Татьяна Иванова, Фатия Иннокентьевна төрөппүт кыыһа Альбина Мельникова, М.К. Аммосов аатынан ХИФУ ФЭИ кафедратын доцена, о.д.а. тыл эттилэр, диэн Үөрэх управлениетын тг-ханаала суруйар. 

Хаартыска: uo@yakadm.ru