Пиибэбит үксэ хойуу чэй буолбута

Дойдубар, түгэх дьиэбитигэр, ол аата дьиэбит салҕааһыныгар, 100-чэкэ киһилээх сыбаайба буолбута. Муус устар саҥата этэ. Оччолорго тыал-күүс, хаар-сиир бөҕөтө түспүтэ. Мин кэргэмминиин, убайым тэрилтэтин, монтердар, бортовой УАЗ массыыналарын уларсан, атын нэһилиэктэн, сэттэ уонча килэмиэтир ыраах сиртэн, пиибэбитин, атын да маллары ыла барбыппыт. Ити сыбаайбабыт буолуо биир күн иннинэ. Массыынабыт “дворнига” үлэлээбэт, кэргэним аҕыйах миэтирэни бара-бара тахсан тирээпкэнэн түннүгүн сотор. Суол-иис дьаабы буоллаҕа, бадараан да чалбах. Оннук айаннаан түүннэри кэлбиппит. Ити кэмнэргэ арыгы маҕаһыыҥҥа толуонунан эрэ бэриллэр, сыбаайбалыыр киһи Сэбиэттэн суруйтаран аҕыйах бытыылканы ылар, онон куораттан пиибэ ылларбыппыт. Онтубутун остолобуойга уурдарбыппыт. Тоҕо диэтэххэ бэйэм оччолорго остолобуойга үлэлиирим, сэбиэдиссэйим сыбаайбаҕа диэн эрдэттэн ас астыы кэлбитэ.

Дьэ, түүннэри айаннаан кэлэн, ким эрэ пиибэ иһээри гыммыта, арай... хойуу чэй. Хаппаҕа туох да аһыллыбыта биллибэт, “чөм” курдук, туох да биллибэт. Соһуйуу буолла, хас да бытыылканы ылан иһэн көрбүттэрэ, чэй буолан иһэр. Дьэ, онтон биллибитэ, остолобуойга үлэлии хаалбыт дьон ылан иһэ сылдьыбыттар, туох да үчүгэйдик, этэргэ дылы, “профессионально” арыйан баран, төттөрү хаппахтаан иһэллэр эбит. Уонна, бэрдин бэртэрэ, төттөрү хойуу, бардарбыт чэйи кутан испиттэр. Онон, олох аҕыйах эрэ бытыылка “төрөөбүтүнэн” астаах буолан биэрбитэ.

Хайыахпытый, сороҕо чэйдээх, сороҕо пиибэлээх бытыылкалар остуолга турдахтара дии. Онтон ол арыйан испит дьону сэбиэдиссэй тиийэн баран саҕаларыттан соспут этэ... Билигин кэпсээн оҥостон күллэрбит да, оччолорго, бээ, ыксаллаах түгэн үөскүү сылдьыбыта.

Аһыы утах туох да үчүгэйгэ тиэрпэт, чөл олоҕу тутуһуҥ!