Петр Пестряков аатынан уулуссаны үөрүүлээхтик арыйдылар

Бэҕэһээ, муус устар 1 күнүгэр, Пригороднай бөһүөлэгэр уһулуччулаах уопсастыбаннай диэйэтэл, САССР үтүөлээх артыыһа, Саха судаарыстыбаннай филармониятын бастакы дириэктэрэ, Эстрада, Үүнэр көлүөнэ тыйаатырдарын уонна Саха цирковой искусствотын сайдыыларыгар бигэ кылааттаах Петр Петрович Пестряков аатынан уулуссаны арыйыы үөрүүлээх тэрээһинэ буолла.
Дьоро түгэни бэлиэтииргэ Петр Петрович дьиэ кэргэнэ, аймах-билэ дьоно, доҕотторо уонна кэллиэгэлэрэ муһуннулар. Тэрээһин бочуоттаах ыалдьытынан Дьокуускай куорат Дууматын бэрэссэдээтэлин бастакы солбуйааччыта Евдокия Евсикова буолла.
Бу 912 м уһуннаах уулуссаҕа Петр Пестряков аатын иҥэрэр туһунан быһаарыыны ааспыт сыл ахсынньы 25 күнүгэр Дьокуускай куорат Дууматын дьокутааттарын ХIІ уочараттаах сиэссийэтигэр  ылыммыттара. Евдокия Евсикова Дуума бу быһаарыытын официальнай докумуонун Петр Пестряков дьиэ кэргэнигэр, чугас дьонугар туттарда.  

«Биһиги норуоппутугар үйэтитии – сүҥкэн суолталаах. Биһиги бүгүн Петр Петрович Пестряков аатын өр сылларга сүгэр уулуссаны арыйарбытыттан, өрөспүүбүлүкэбит сайдыытыгар үгүһү оҥорбут киһи аатын үйэтитэрбититтэн үөрэбит», – диэн Евдокия Евсикова эҕэрдэ тылыгар эттэ.
Петр Пестряков дьиэ кэргэнэ чугас киһилэрин аатын уулуссаҕа иҥэрэр быһаарыы ылыллыбытыгар Дьокуускай куорат Дууматыгар барҕа махталларын эттилэр.  Бу түгэн чугас киһилэрин үтүө аатыгар ытыктабыл эрэ бэлиэтэ буолбакка, бу кини өрөспүүбүлүкэ сайдыытыгар уонна уопсастыба олоҕор киллэрбит бигэ кылаатын билинии буоларын үөрэ бэлиэтээтилэр.

 Хаартыска: Дьокуускай куорат Дууматын официальнай телеграм-каналыттан