Перинатальнай кииҥҥэ Хат дьахтар күнүн бэлиэтээтилэр

Бэҕэһээ, муус устар 7 күнүгэр,  өрөспүүбүлүкэтээҕи клиническэй балыыһа перинатальнай киинигэр Бүтүн Арассыыйатааҕы Хат дьахтар күнүн бэлиэтиир дьоро тэрээһин буолла. Кэрэ аҥаардарга анаан викториналар уонна куонкурустар ыытылыннылар.
"Саха сиригэр сыл аайы уон тыһыынчаттан тахса оҕо төрүүр. Төрүүр оҕо 50 %-на биһиги перинатальнай кииммитигэр күн сирин көрөр. Биһиги дьахталлары өйүүбүт уонна хат кэмнэрэ этэҥҥэ үчүгэйдик ааһарыгар бары усулуобуйаны оҥоробут", – диэн өрөспүүбүлүкэтээҕи клиническэй балыыһа кылаабынай бырааһа Алена Никитина санаатын үллэһиннэ.
Маны тэҥэ ийэ буолаары сылдьар кэрэ аҥаардары уокуруктааҕы дьаһалта уопсастыбаннай сибээстэргэ уонна ыччат бэлиитикэтигэр управлениетын начальнига Андрей Михайлов эҕэрдэлээтэ: "Бу бэлиэ күн саҥа олоҕу сүрэхтэрин анныгар илдьэ сылдьар, төрүтү ууһатар, кэскили тэнитэр дьахталларбытыгар ытыктабылбытын, сөҕүүбүтүн-махтайыыбытын этэрбитигэр биир бэртээхэй төрүөт буолар. Дьокуускай уокуруктааҕы дьаһалтата ийэни уонна оҕону өйүүр боппуруостары инники күөҥҥэ тутар, ийэ буолаары сылдьааччыларга уонна эдэр дьиэ кэргэҥҥэ олохторугар табыгастаах усулуобуйаны оҥорорго болҕомтону уурар".

Хат дьахтар күнэ Арассыыйаҕа сылга иккитэ – муус устар 7 уонна алтынньы 7 күннэригэр бэлиэтэнэр. Бу бэлиэ күн сүрүн соругунан уопсастыбаҕа ийэ буолаары сылдьар дьахтар аатын үрдэтэн, төрөөһүнү үксэтии буолар.

 Дьокуускай уокуруктааҕы дьаһалтатын уопсастыбаннай сибээстэргэ уонна ыччат бэлиитикэтигэр управлениетын иһитиннэриитинэн