Павел Пинигин спортивнай хорсун быһыыта

Ол курдук, кулун тутар 6 күнэ – Георгий Балакшин төрөөбүт күнэ, кулун тутар 7 күнэ – Роман Дмитриев, кулун тутар 10 күнэ – Виктор Лебедев, кулун тутар 12 күнэ – Павел Пинигин, кулун тутар 19 күнэ – Айаал Лазарев, кулун тутар 28 күнэ – Сардаана Трофимова.

Бүгүн, кулун тутар 12 күнүгэр, Монреаль олимпиадатын, аан дойду үс төгүллээх чемпиона, Европа уонна Сэбиэскэй Сойуус чемпионаттарын кыайыылааҕа Павел Пинигин төрөөбүт күнүнэн «Саха» НКИХ архыыбыттан нууччалыы интервьюну булан, «Киин куорат» ааҕааччыларыгар тылбаастаан таһаарарга сананныбыт (Видеону сибээс кыайбатынан).

Бу – Павел Пинигин 1975 сыллаахха ФРГга буолбут Европа чемпионатыгар аан дойду чемпиона Адольф Зегеры кытта киирсиитэ. Күрэхтэһии 74 кг диэри категорияҕа буолбута. Павел Пинигин иннигэр дойду сүүмэрдэммит хамаандата кытаанах соругу туруорбута – бэйэтэ тустар 68 кг өрө тахсан, 74 кг киирсэн, бүтүн Сэбиэскэй Сойуус чиэһин көмүскүөхтээҕэ. Утарсааччыта – 82 кг аан дойду уонна Европа икки төгүллээх чемпиона, олимпиада призера, көбүөр хаһаайына ньиэмэс Адольф Зегер. Ол эбэтэр Пинигин үөһээ тахсыбыт буоллаҕына, Зегер балайда аллараа түһэн биэрбит.

Бу, кытаанаҕын ааһан, олус эппиэтинэстээх киирсии туһунан Павел Пинигин бу курдук кэпсээбит:

– Бу күрэхтэһиибин Аҕа дойду Улуу сэриитин кыттыылааҕа аҕабар Павел Титович Пинигиҥҥэ анаабытым. Тоҕо диэтэххэ күрэхтэһии Германияҕа, оччолорго Арҕаа Германияҕа, буолбута. Аны туран, 68 кг тустар киһини 74 кг киллэрбиттэрэ. Финал аҥаарынааҕы киирсиигэ көбүөр хаһаайына Адольф Зегеры кытта тустар буоллум. Урутаан эттэххэ, бу күрэхтэһии кэнниттэн баара эрэ 2 дуу, 3 дуу ыйынан Адольф Зегер Минскэйгэ Аан дойду чемпионатыгар кэлэн, 82 кг чемпионнаабыта. Ол эбэтэр итинник модун кыахтаах бөҕөс, эбиитин бэйэлээх бэйэтин дойдутугар, миигин, хас да ыйааһын өрө тахсыбыт киһини, этэргэ дылы, аҥаар илиитинэн хам баттыыр былааннаах киирдэҕэ.

Бастакы киирсиилэргэ мин кыратык чорбойон испитим – 5:3, 5:4, 7:6 диэбит курдук. Оччотооҕу быраабыла – 3-түү мүнүүтэлээх 3 период. Дьэ, иккис период саҕаланна. Мин 8:7 очколаахпын. Көрөөччүлэр, биллэн турар, бары кэриэтэ ньиэмэстэр, ону кытта сөпсөспөттөр, ыһыы да хаһыы. Мин, төһө да үчүгэй бэлэмнээх кэллэрбин, аан дойду көбүөрдэригэр тустар уопутум суох буоллаҕа. Тренерим үөрэҕин олох өйдүү сылдьабын, Зегеры кытта ханнык тактиканан киирсэрбин билэбин. Билигин олох хатыламмат, ураты тиэхиньикэлээх бөҕөс этэ диэн этиэххэ сөп. Партерга алларааттан ордук табыллан, көхтөөхтүк киирсэрэ, итинник тустуук аан дойдуга суох, баар да буолуо биллибэт. Ити курдук үһүс бүтэһик период саҕаланна. Арай, свисток тыаһаатын, көбүөргэ киирээппитин кытта, почти нокаут ыллым. Ол эбэтэр Зегер миэхэ утары ыстанан киирэн, төбөтүнэн үөһээ тиистэрбин көтүрү көтөн кэбистэ. Тиистэрим атахтара эрэ хааллылар. Өйбүн сүтэрэн киирэн бардым. Көбүөрүм таҥнары эргийдэ. Боксердарга ити нокаут диэн буоллаҕа. Онтон хайдах тулуктаспыппын билигин да өйдөөбөппүн. Хаан-сиин буолбуппун көрөн, судьуйалар тустууну тохтоттулар. Оннооҕор тренерим, ССРС сүүмэрдэммит хамаандатын сүрүн тренерэ Юрий Шахмурадов, куттаммыт этэ. Тиистэрим нэһиилэ миилэбиттэн эрэ иилистэн салыбырыы сылдьаллара амырыын көстүү буолуо. Айахпын атар кыаҕым суох, субу салыбыраһа сылдьаллар. Мэһэйдииллэр. Онтон дьэ ыарыытыттан мэйиим куугунуор диэри сымыһахпын быһа ытырдым да, киирсиибин 12:11 түмүктээн, Европа чемпиона буолары ситиспитим.

Дьэ, чахчы, спортивнай хорсун, дойду чиэһин туһугар дьоруойдуу быһыы.