«Патриот» ыччат киинин арыйарга бэлэмнииллэр

Ыччат үүнэригэр-сайдарыгар, олоххо бэйэтин буларыгар тирэх буолар киини ахсынньы ыйга арыйары былаанныыллар. Ол курдук, Дьокуускайга «Патриот» ыччат элбэх хайысхалаах киинин тутуу былааннаахтык барар.

Санатар буоллахха, бу тутуу РФ Бэрэсидьиэнин уонна Росмолодежь өйөбүлүнэн, «Ыччат уонна оҕолор» национальнай бырайыак иһинэн үлэлиир «Россия – страна возможностей» бырайыак чэрчитинэн ыытыллар.

Ыччат киинэ үтүө санааны уонна волонтердааһыны сайыннарарга, патриоттуу иитии көрүҥнэрин биир сүрүннээһиҥҥэ, ыччат көҕүлээһиннэрин өйүүр соруктаах СӨ Ил Дарханын сорудаҕынан тэриллибитэ.

Эбийиэк уопсай иэнэ 3 тыһ. кв. м тахса. Манна былаан быһыытынан ыччакка аналлаах хас да хайысхалаах эйгэ тэриллиэ: бииргэ үлэлииргэ, идиэйэлэри үллэстэргэ коворкинг-хостор, видеороликтары уонна подкастары устарга зоналар, йоганан, үҥкүүнэн дьарыктанарга хостор, тренажернай саала уо.д.а.

Саха сиригэр ыччаты патриоттуу иитиини СӨ Ыччат дьыалаларыгар уонна социальнай коммуникацияларга министиэристибэтэ сүрүннүүр. Миниистир Петр Шамаев – анал байыаннай дьайыы кыттыылааҕа, байыаннай дьайыы бэтэрээнэ.

«Миэхэ, байыаннай дьайыыга кыттыбыт уопуттаах киһиэхэ, бу хайысханы салайыы ордук чиэстээх уонна сүҥкэн эппиэтинэстээх. Хаачыстыбалаахтык бэлэмнэнии, өй-санаа халбаҥнаабат буолуута уонна Ийэ дойдуга истиҥ таптал төһөлөөх суолталааҕын тус уопуппунан билэбин», – диэн этэр Петр Шамаев.

Хаартыска: «Патриот» ыччат киинэ