«Патриот» ыччат киинэ Дьокуускайга ахсынньы 15 күнүгэр арыллыаҕа

«Патриот» элбэх функциялаах ыччат киинэ Дьокуускайга ахсынньы 15 күнүгэр арыллаары турар. Ол туһунан «Актуальное интервью» биэриигэ миниистир Петр Шамаев иһитиннэрдэ.

«Патриот» киин сүрүн сыала – патриоттуу тыыҥҥа иитиини күүһүрдүү уонна ыччат олоххо бэйэтин миэстэтин булунарыгар тирэх буолуу», – диэтэ Петр Шамаев. Маннык былаһааккалары өрөспүүбүлүкэ атын даҕаны оройуоннарыгар арыйар былаан баар.
Петр Шамаев бэлиэтээбитинэн, Ил Дархан Айсен Николаев сорудаҕынан патриотическай иитии сүрүн үлэтэ ыччат дьыалатыгар уонна социальнай коммуникациялар министиэристибэтигэр сүрүннэммит. Онон ордук чуолаан тыа нэһилиэктэригэр ыччат политикатын иилиир-саҕалыыр квалификациялаах исписэлиистэр наадаларын эттэ. Кинилэр тыа сиригэр ыччаты олохсутар усулуобуйаны тэрийии сүктэриллэр, диэн Ил Дархан уонна Бырабыыталыстыба пресс-сулууспата иһитиннэрэр.