Пастереллез ыарыыттан вакцинация иккис түһүмэҕэ муус устар 11 күнүттэн саҕаланыаҕа

Бэлиэтээн эттэххэ, ыарыыны сэрэтэр бастакы вакцинация Дьокуускай куоракка кулун тутар 28-29 күннэригэр ыытыллыбыта. Бүгүҥҥү күҥҥэ сүөһүлээх хаһаайыстыбалартан үҥсүү суох. СӨ Бэтэринээр управлениета иһитиннэрэринэн, муус устар 11 күнүттэн вакцинация иккис түһүмэҕэ былааннанар.

Санатар буоллахха, пастереллез ыарыыны утары вакцина иммунитеты үөскэтэр. Вакцинация босхо ыытыллар. Управлениеҕа бэлиэтииллэринэн, хаһаайыстыбалар - хас биирдии сүөһүлэрин «ВетИС» ФГИС систиэмэ «Хорриот» компоненыгар, дьиэ сүөһүтүн «Все звери» систиэмэҕэ регистрациялыыллара булгуччулаах. Маннык түбэлтэ эпизоотическэй балаһыанньаны кэтээн көрөр кыаҕы биэрэр.

Үөскээбит быһыынан-майгынан СӨ Тыа хаһаайыстыбатын министиэристибэтин иһинэн суһал ыстаап үлэлиир.

Бэтэринээр управлениетын «суһал линията»: +7(4112) 508-766 (суукканы эргиччи).

Улуустарга арыллыбыт «суһал линиялар» нүөмэрдэрэ: https://upr-vet.sakha.gov.ru/news/18201.