Паром сыаната үрдүөҕэ

Алтынньы ортотуттан мууһу алдьатан айанныыр паромнар, ыарахан уйуктаах бааржалары кытта сырыылара саҕаланар.

“Навигация официальнайдык сабыллыбытын кэннэ, тарыыптары судаарыстыба салайбат – өҥөнү оҥорооччулар бэйэлэрэ быһааран туруораллар. Сезоннар атастаһыыларын саҕана сыана хайаан да ыарыыр – “Паромы Якутии” ХЭТ сыанатын үрдэтэр былааннаах”, – диэн министиэристибэ иһитиннэриитигэр суруллар.

Сэтинньиттэн Жатай – Төхтүр хайысханан паромнар “ЛОРП” ПАУо ледоколлара арыалдьыттаах сылдьыахтара. Саҥа тарыыптары хампаанньа саайтыгар таһаарыахтаахтар.

Өрүс уҥуор айанныыр пассажирдарга салгын сыттыктаах суудуналар уонна аэробаттар үлэлиэхтэрэ. Уопсайа 30-35 суудуна тахсара былааннанар, ол иһигэр Дьокуускай – Аллараа Бэстээх хайысхатынан 25 көлө үлэлиэҕэ.