Пааматынньык тобугун дуу, муннун дуу аалар үгэс биһиэхэ тоҕо суоҕуй?

Холобур, муннун, сиэбин, атаҕын ааллаххытына, баай-талым олохтонуоххут дииллэр. Эбэтэр илиитин, кынатын, сүрэҕин дуу туттаххытына, таптал уотугар умайыаххыт диэн буолар. Ол түмүгэр ыраахтан килэбэчийэн көстөр муруннаах, сүүстээх, бэл диэтэр, кээмэйэ биллэ кыччаабыт уорганнаах пааматынньыктар баар буолаллар. Холобур, Италияҕа тапталга баҕарааччылар Джульетта статуятын уҥа түөһүн быһа аалбыттарын түмүгэр пааматынньык бу дэтээлин куоппуйанан уларытарга күһэллибиттэр. Биллэн турар, искусствоведтар маннык быһыыланыыны вандализмынан ааҕаллар уонна утараллар. 

Арассыыйа да олохтоохторо хаалсыбаттар. Холобур, Санкт-Петербург туристара Чижик-Пыжик тумсун, Остап Бендер муннун тумнубаттар. Липецк куоракка 2016 сыллаахха скульптор Андрей Сулин оҥорбут «Фото на память» композициятын дьоруойдарын хас биирдиилэрин мунна ыраахтан килэпэчийэн көстөр (хаартыскаҕа).

Үөһээ эппиппит курдук, бу барыта вандаллааһыҥҥа тэҥнэһэр. Маннык «үгэс» патинаны (ардахтан-хаартан, титииттэн-тымныыттан харыстыыр араҥа) быһа аалан, пааматынньыгы алдьаныыга тиэрдэр.

Биһиэхэ, Дьокуускайга, дьолго, пааматынньытары имэрийэр-томоруйар, таарыйар, аалар маннык толоос үгэс суох. Ол, бука, сахаларга түҥ былыргыттан эмэгэттэри, иччилэри, холобур, ытык мастары илиинэн таарыйар аньыыга тэҥнэһэн, кытаанахтык бобулларын иһин буолуо. Биһиги ол оннугар айах тутар, салама ыйыыр үгэстээхпит.

Аҕыйах хонугунан Туймаада ыһыаҕар бараары олоробут. Ыраахтан-чугастан мустубут ыһыахчыттар бука бары Алтан Сэргэни имэрийэ, кууһа тиийиэхтэрэ турдаҕа. Маныаха тустаах сиэри-туому тутуһары умнар сатаммат. Ол курдук, сэргэни маҥнай үстэ эргийэн эрэ баран үтүөнү эрэ санаан туран сүгүрүйэр көҥүллэнэр.