Пааматынньыга көһөртөрүөхтэрин баҕараллар

От ыйын 14 күнүгэр баһылык Евгений Григорьев уочараттаах тус приемугар куорат олохтооҕо Надежда Левина биллиилээх экономист, суруйааччы, уопсастыбаннай диэйэтэл Кузьма Гаврилов (1890-1938) бюһун атын көстүүлээх сиргэ көһөрөр туһунан көрдөһүүлээх кэлбит.
Бюст 2016 сыллаахха Залог оройуонугар «Холбос» кооператив дьиэтин таһыгар туруоруллубут. Надежда Левина Кузьма Гаврилов аймаҕа буоларынан, пааматынньыгы дьон-сэргэ сылдьар сиригэр көһөрөргө көрдөстө. Евгений Григорьев туһааннаах биэдэмистибэлэргэ бу боппуруоһу үөрэтэргэ сорудахтаата, диэн Олохтоох дьаһалта пресс-сулууспата иһитиннэрэр.
Санатар буоллахха, баһылык гражданнары кытта эрдэттэн суруйтарыынан көрсөр. Көрсүһүүгэ суруйтарарга Сурук отделыгар эбэтэр Олохтоох дьаһалта тэрилтэлэригэр сайабылыанньа суруйуохха наада. Сайабылыанньаҕа быһаартарыахтаах боппуруоһу сиһилии ыйар уонна инники өттүгэр атын инстанцияларынан туох быһаарыы ылыллыбытын сыһыарар наада. Маны сэргэ тус дааннайдары ыйар ирдэнэр: төлөпүөн нүөмэрэ, электроннай аадырыс.
Сайабылыанньаны ыытар ньымалар:
– yakutsk@sakha.ru Олохтоох дьаһалта официальнай электроннай почтатыгар;
– 40-80-76 төлөпүөнүнэн;
– Дьокуускай к., Ленин проспега, 15 аадырыска тиийэн;
– Сурук отделын аадырыһа: Дьокуускай к., Ленин проспега, 15, 113 кэб., үлэ күннэригэр сарсыарда 09:00 чаастан киэһэ 18:00 чааска диэри (эбиэккэ тохтобул – 13:00-14:00 чч.).