Ойуур-тыа умайыытын таһаарбат гына, сэрэх буолуохха

Sakha.gov.ru суруйарынан, ыам ыйын  18 күнүн 12 чаастааҕы туругунан, Саха сирин үрдүнэн биир тыа умайыыта бэлиэтэммит. Ол умайыы Нам оройуонугар 3 гаа сиргэ тайыыр. Уоту умуруорууга 18 киһи, 5 тиэхиньикэ үлэлии сылдьар.

 «Убаастабыллаах гражданнар, ойуур, тыа умайыыта баарын көрдүгүт да, суһаллык Ойуур хаһаайыстыбатын эрэгийиэннээҕи диспиэччэрдэрин сулууспатын 44-74-76 нүөмэригэр эрийэр буолуҥ. Ону тэҥэ ойуур харыстабылын Кэлим нүөмэригэр биллэрэр кыахтааххыт: 8-800-100-94-00», — диэн Экология, айылҕаны туһаныы уонна ойуур хаһаайыстыбатын миниистирин солбуйааччы, өрөспүүбүлүкэ кылаабынай лесничэйэ Андрей Коноплев иһитиннэрдэ.

Быйыл уот кэбэҕэстик туруон сөптөөх кэмэ саҕаланыаҕыттан Саха сирин үрдүнэн уопсайа 14 ойуур баһаара буолбут. Уокка былдьаммыт ойуур уопсай иэнэ  65,3 гаа. Тэҥнээн этэр буоллахха, ааспыт сыл туһааннаах кэмигэр, ол аата баччаларга 76 тыа баһаара бэлиэтэммит. Уот 35 тыһ. тахса гаа сири сабардаабыта.

Ону таһынан ландшафтнай дэнэр, ол эбэтэр киһи-сүөһү тиийбэт буолан, кыайан умуруоруллубат 10 чиэски сытар ыраах сиргэ умайыы тахсыбыт. Былырыын баччаҕа итинник 166 баһаарга 5414 гаалаах ойуур былдьаммыт.