Ойуур этикета: Отону хайдах хомуйуохтаахпытый?

Ыарҕалаах култууралар сыллата саҥа үнүгэстэри таһаараллар – мантан эһиилигэр сибэкки, отон тахсар. Ол эбэтэр билигин сир астыы сылдьан хайдах туттарбытыттан-хаптарбытыттан эһиил ойуурбут туруга быһаччы тутулуктаах.

Отону илиинэн хомуйар ордук – отон хомуйар араас тэриллэри туттуу айылҕаны алдьатар. Маннык тэриллэр сиппит отону эрэ буолбакка, саҥа үнүгэстэри кытта үргүүллэр. Оттон илиинэн үргээн эһиил бу сиргэ эмиэ элбэх сир аһа тахсарыгар төһүү буолабыт.

Сир астыы сылдьан үүнээйи угун тоһуппакка ылгаан ылыллыахтаах. Хаптаҕас курдук үүнээйи киһи үргүүрүгэр табыгаһа суох соҕус сиргэ үүнэр буоллаҕына, анал секатор диэн тэрилинэн отонноох эрэ лабаатын кырыйан ылыахха сөп.

Отону барытын олоччу тоноон ылыллыбат – үс гыммыт биирэ угугар хаалыахтаах. Бу чыычаахтарга, кыылларга уонна эһиги кэннигититтэн кэлэр дьоҥҥо ананыахтаах. Барытын бүтэһигэр диэри имири сотуллубат – аар тайҕа суруллубатах сокуона.

Сир аһын сатабыллаахтык уонна өйдөөхтүк хомуйдахпытына, биһиги бэйэбит аһылыкпытын эрэ хааччыныынан муҥурдаммакка, үүнэр көлүөнэлэргэ хаалларар баайдаах буолабыт.