Ойуур баһаарын утары охсуһууга – 5,5 миллиард солк.

Ол курдук, хоту улуустарга баһаары умуруорууга анаан 10 Ми-8 бөртөлүөт, ону сэргэ, уот турбутун биллэрэр 60 пилота суох көтөр тэрил үлэлиэҕэ, онтон үксэ – былырыын аһыллыбыт “Полярнай” киин үлэтин иитинэн.   

Ил Дархан үлэ түмүктээх буоларыгар эрэнэрин биллэрдэ. Итиэннэ билиҥҥи өйдөөх тэриллэр хас да чаас араас маршруттарынан көтөр, баһаары чопчу билэр кыахтаахтарын кэпсээтэ.  

“Пилота суох тиэхиньикэ саҥа саҕаламмыт баһаардары көдьүүстээхтик билэргэ уонна ону умуруорарга көмөлөһүө диэн санаалаахпыт”, – диэтэ Айсен Николаев.

Эбэн эттэххэ, бу сааскыттан Саха сиригэр хайыы үйэ биэс ойуур баһаара бэлиэтэммит. Умайыы уопсай иэнэ – 50 гектар кэриҥэ. Тэҥнээн көрөр буоллахха, былырыын бу кэмҥэ Саха сиригэр уонунан тыһыынча гектар уокка былдьаммыт.

Ил Дархан иһитиннэрбитинэн, быйыл ойуур баһаарын утары охсуһууга уонна бэлэмнэнии үлэтин ыытыыга федеральнай уонна өрөспүүбүлүкэ бүддьүөтүттэн 5,5 миллиард солкуобай тыырыллыбыт.

Өрөспүүбүлүкэ үрдүнэн түөрт саҥа авиасалаа үлэтин саҕалаабыт – Витимҥэ, Саҥыйахтаахха, Эдьигээҥҥэ уонна Орто Халымаҕа.   

Маны таһынан, Авиалесоохрана ыстаатын кэҥэппиттэр. Ону сэргэ баһаары умуруорар элбэх тиэхиньикэ ылыллыбыт.