Ойуур баһаарын төрүөтэ буолумаҥ!

Халлаан сылыйан, салгыҥҥа, айылҕаҕа дьаарбайарга тоҕоостоох кэмнэр үүннүлэр. Ол эрээри ыам ыйын маҥнайгы күннэригэр номнуо бастакы «уоттаах сводкалар» кэллилэр.
Үөһээ Дьааҥы оройуонугар ойуур баһаара турда. Олохтоох сулууспаларга Авиалесоохрана этэрээтэ көмөҕө тиийдэ. 

Дьокуускай куоракка быһыы-майгы эриэ-дэхси. Ол эрээри ити холкутуйарга төрүөт биэрбэт. Даача сезона, айылҕаҕа сынньалаҥ, бултааһын – бу барыта ойуур баһаарын төрдө буолар түгэннэр.
«Баһаартан сэрэхтээх буолуу ураты эрэсиимигэр биирдиилээн дьону 10-тан 20 тыһ. солк. диэри кээмэйдээх ыстараап күүтэр, дуоһунастаах сирэйдэри – 30-тан 60 тыһ. солк. диэри; юридическэй сирэйдэри – 400 тыһ. солк. диэри. Бу күннэргэ полицияны уонна экологтары кытта кыттыгас эриэйдэлэри оҥоробут, нэһилиэнньэҕэ сэрэтэр суруктары тарҕатабыт, бэсиэдэ ыытабыт», – диэн иһитиннэрдэ Илья Андреев, Дьокуускай куораттааҕы ГОЧС уонна баһаартан сэрэхтээх буолууну хааччыйыыга сулууспа үлэһитэ.

«Ыам ыйын бырааһынньыктарыгар баһаартан сэрэхтээх буолуу быраабылаларын кытаанахтык тутуһарга ыҥырабыт. Ойуур баһаарын 90%-гар киһи буруйдаах. Ол төрүөтүнэн кутааны оттуу, табахтааһын о.д.а. буолаллар, соруйан уматыы да баар. Дьокуускай куорат территориятыгар айылҕаҕа сынньанар сирдэр Кангалаас, Хатас нэһилиэктэрин туһаайыыларынан, Покровскай тракт, 20 км быһаарыллыбыттара. Бу көҥүллээх сирдэргэ хаһан баҕар мустуохха, тахсан айылҕалыын алтыһыахха сөп. Ол эрээри шашлык буһарарга анал мангал, чох эрэ туттуллара көҥүллэнэр; уоту күөдьүтэргэ убаҕас уматыгы туттар бобуллар», – диэн Дьокуускай куорат кэтээн көрүүгэ уонна сэрэтэр үлэни ыытыыга салаатын инспектора Василий Самсонов бэлиэтиир.

Самсонов Покровскай тракт эргин ыытыллыбыт эриэйдэ түмүгэ сынньанааччылар кэннилэриттэн элбэх бөх хааларын көрдөрбүтүн иһитиннэрдэ. «Куорат дьаһалтата нэһилиэнньэ маассабайдык сынньанар сирдэригэр бөх быраҕар анал миэстэлэри кичэйэн тэрийиэн наада. Анал сир суоҕуттан үлүбээй чөмөхтөммүт бөх кэбэҕэстик баһаар биричиинэтэ буолар кутталлаах», – диэтэ кини.
Айылҕа харыстабылын министиэристибэтин ойууру кэтээн көрүүгэ салаатын старший судаарыстыбаннай инспектора Константин Парников бу этиин кытта сөбүлэһэр. Маны сэргэ хас биирдии гражданин ойуурга уоттан сэрэхтээх буолууну тутуһары таһынан, айылҕа ыраас буоларыгар кыһаллыахтаах диэн эбэн эттэ.