Ойуунускай 1938 с. хаайыллыар диэри олорбут дьиэтэ ханна баарый?

Бу дьиэни 19-с үйэ бүтүүтэ Дьокуускай баһылыгын солбуйааччы П.Я. Бонячук туттарбыт. Дьиэ турар сиригэр, Сэбиэскэй былаас олохтоммутун кэннэ, П.А. Ойуунускай бэйэтэ Саха сиринээҕи национальнай байыаннай оскуоланы арыйтарар, оттон бэйэтэ дьиэ кэргэниниин ити дьиэҕэ 1935-1938 сс. олорор.

1955 с. Ойуунускай үтүө аата тиллибитин кэннэ, кини олорбут дьиэтигэр музей арыйар туһунан этиилэр киирэллэр. Ол түмүгэр 1970 с. бу дьиэҕэ Ойуунускай бэйэтин кэмигэр олорбут укулаатын сөргүтэн, мемориальнай дьиэ арыллар.

Ол кэмтэн 2016 с. диэри улахан өрөмүөн үлэтэ барбат. Билигин бу дьиэ хамсаан, муостатыгар свая анньан тахсан, ититииттэн, ууттан-уоттан арахсан турар. Кэлэр сылга бу дьиэни хапытаалынай өрөмүөҥҥэ бэлэмниир сорук турар. Онуоха биир улахан кыһалҕа: музей тиэргэнэ бүтүннүү саас ууга барарынан, итиэннэ ардах уута мустан барар сирэ суох буолан, үлэһиттэр, носуоһунан уутун оботторор түбүккэ түһэллэрэ.
Чопчулаан эттэххэ, Ойуунускай сырдык аата 1955 с. ахсынньы 15 күнүгэр Саха АССР прокуратуратын уурааҕынан тиллибитэ. Бу күнтэн 70 сыл ааспытын эрэ кэннэ кини нэһилиэстибэтэ норуокка төннүөхтээҕэ. Ол болдьох 2025 сыл ахсынньы 15 күнүгэр туолбутунан, Ойуунускай аатынан Литература музейын дириэктэрэ Рустам Каженкин П.А. Ойуунускай Дьокуускайга сыһыаннаах саамай чугас уонна мемориал суолталаах эбийиэктэрэ сиэр быһыытынан сөргүтүллэн, норуокка биллэр-көстөр буолалларын инниттэн өрөмүөн, көмө боппуруостарын туруорсар.
Быһатын эттэххэ, музей салалтата тиэргэни куорат коммуникацияларыгар холбоон, ардах-хаар уутуттан харыстыыр дьаһаллары ылынар этиилээх. Ол курдук, бу боппуруоһу Рустам Каженкин куорат баһылыгын култуура үлэһиттэрин иннигэр отчуотугар туруорда.