Отоһут Лена Сорокина "Киин куорат" ааҕааччыларын ыйытыыларыгар хоруйдуоҕа

Ааһа баран, атын оттортон биир сүрүн уратытынан сибэккитэ, сэбирдэҕэ, силиһэ барыта туһаҕа тахсара буолар. Холобур, билигин сибэккитин хомуйан, аска, салааттарга туһаныахха сөп.

Отоһут Лена Сорокина "Киин куоракка" кэпсээбитинэн, ньээм сибэккитэ быары ыраастыыр, токсиннары таһаарар, хааны ыраастыыр аналлаах, харахха эмиэ үчүгэй. Мэйии когнитивнай функциятын тупсарар буолан оҕо сайдыытыгар туһалыыр, саастаах дьоҥҥо түөһэйии профилактикатын быһыытынан аһылыкка саатар сайын сибиэһэйдии сиэтиэххэ наада эбит. Барыанньалыахха эмиэ сөп. Ньээм сибэккитэ маны таһынан, күнү санатар көрүҥнээҕин быһыытынан, үөрүүнү үксэтэр, олоҕу уруйдуур аналлаах, киһи үөрүнньэҥ буоларыгар кытта көмөлөһөр эбит.

Сэбирдэҕин сибиэһэйдии смузи оҥостоллор. Бу смузига оҕуруот аһын сэбирдэхтэрин кытта ньээм сэбирдэҕин куталлар.

Исписэлиистэр бастаан сииргэ биир сибэккиттэн саҕалыырга сүбэлииллэр – салаакка саһархайын эрэ бытарытабыт. Күн аайы биирдиинэн эбэн, 10 сибэккигэ диэри тиэрдэбит. Оҕуруот аһыттан салаакка сибиэһэйдии эбэн сиибит.

Ньээм сибэккитинэн сироп оҥостор олус судургу ньыма баар: өстүөкүлэ бааҥкаҕа сибэккини уонна саахары уочаратынан хаста да дьапталҕалаан кутан баран күн уотугар туруорабыт. Бэйэтэ ферментацияланан наһаа туһалаах сироп буолан тахсар.

Ньээм сибэккитин сибиэһэйдии натуральнай мүөккэ булкуйдахпытына, мүөппүт туһатын күүһүрдэн биэрэбит. Контейнерга хомуйан тоҥорон хаһаанабыт, хатарбаппыт.

Ньээм өссө биир үтүө өрүтэ – кини айылҕа пребиотига. Ол аата ис-үөс үлэтин тупсарар. Ону кытта вирустары утары үлэлиир, сүрэх, тымыр ыарыыларын сэрэтэр.

Аҕыйах сылтан бэттэх Дьокуускайга тыҥырахтаах бэрчээккэ кэтэн баран ньээм силиһин түөрэ сылдьар омуктары көрөр буолбуппут. Ааҕаачыларбыт бэркиһээн хаста да хаартыска ыыта, суруйа сылдьыбыттаахтар. Отоһут этэринэн, ньээм силиһин күһүн маҥнайгы хаар түһүөн иннинэ хомуллар эбит. Уонна куорат курдук элбэх киһи кэлэр-барар, тэпсэр сириттэн, суол кытыытыттан ылыллыбат. 

"Ньээм силиһин сатаан хостуур, туһанар отоһут – ол аата үрдүк таһымҥа тахсыбыт маастар диэн буолар. Хатарыыта туспа технологиялаах, уустук соҕус, духуопкаҕа эҥин хатарыллар. Араак ыарыы бары стадияларыгар туттуллар күүстээх эмтээх", – диэтэ биһигини кытта ыкса үлэлэһэр отоһут Лена Сорокина.

«Киин куорат» ньээм уонна да атын эмтээх оттор туһунан отоһут Лена Сорокинаны  кытта интервьютун манна билсиэххэ сөп: https://kiinkuorat.ru/articles/emteeh-otu-homuyar-kemi-m-chch-tutuma

“Алгыс От” отоһут уһуйаанын выпускнига, “Алгыс От” өрөспүүбүлүкэтээҕи отоһуттар түмсүүлэрин чилиэнэ Лена Сорокина «Киин куорат» ааҕааччыларын эмтээх оту хомуйуу, харайыы туһунан ыйытыыларыгар хоруйдуурга бэлэмин биллэрдэ. Ыйытыыларгытын «Киин куорат» социальнай ситимнэригэр “комментарийга” күүтэбит:

Вконтакте ситиммит: https://vk.ru/kiinkuorat

МАХ ханаалбыт: https://max.ru/join/qU4_ZK8_kjZplZP9p0OCty-ouzOSzBeOWvUtr2FgyIg

Телеграм ханаалбыт: https://t.me/kiin_kyorat_gazeta