От ыйынааҕы уларыйыылар

Ый аайы сонунтан сонун сокуоннар, уларыйыылар киирэ тураллар. От ыйыгар туох уларыйыы киирдэ?

Тус дааннайы харыстыыллар

Гражданнар тус дааннайдарын кытта үлэлиир, ону туһанар тэрилтэлэр мантан салгыы Арассыыйа уонна дойду территориятыгар баар сервердэригэр уонна data-кииннэргэ эрэ харайар, үлэлэһэр бырааптаналлар. Сыала-соруга – дойду олохтоохторун тус чахчылара (дааннайдара) туора харах көрүүтүгэр тахсыбатын, кистэлэҥҥэ тутулларын ситиһии, хакердар атаакаларыгар түбэспэти уонна омук судаарыстыбаларын өттүттэн орооһуу тахсыбатын хааччыйыы.

Бу уларыйыыны билиммэккэ дойду тас өттүгэр баар сервергэ харайар хампаанньалары 1 мөл. солк. саҕалаан, 6 мөл. солк. тиийэ  ыстарааптыахтара. Иккистээн түбэһиигэ ыстараап суумата букатын да 6-18 мөл. солк. тиийэ улаатар. Маннык накаастабыл улахан хампаанньаларга, о.э. юридическай сирэйдэргэ эрэ олохтоммот, биирдиилээн урбаанньыттарга эмиэ сыһыаннаах!

Суукка докумуону ыраахтан олорон ыытыахха сөп

Чопчута, административнай буруйу кэһиини көрөр суукка ирдэнэр докумуоннары сирэй тиийэ сатаабакка, онлайн ыытыахха эмиэ сөп. Суут кыттааччылара – о.и. эмсэҕэлээччи, уорбаланааччы, былаас уорганнара уонна олор бэрэстэбиитэллэрэ – суукка туттарыахтаах сайабылыанньаларын, үҥсүүлэрин, ходатайстволарын уо.д.а. докумуоннарын электроннай көрүҥүнэн ыытыахтарын сөп. Онуоха хайаан да «Судаарыстыбаннай өҥө» порталын уонна анал онлайн-сервистэр нөҥүө ыытыахха сөп. Биллэн турар,  оннукка тэхиньиичэскэй хааччыллыы эппиэттэһэр түгэнигэр.

Иккиһинэн, онлайн ыытыллар докумуон булгуччу күүһүрдүллүбүт квалифицированнай электроннай бэчээтинэн бигэргэммит буолуохтаах. Оннук бэчээттэнэргэ туох ирдэнэрин  МФЦ-лартан эбэтэр «Госуслуги» порталыгар киирэн билсиэххэ сөп.

Административнай дьыала суукка көрүллэригэр суут кыттыылаахтара видео-сибээс да көмөтүнэн  кытталлара хааччахтаммат.

СВО кыттыылааҕа өлбүт түгэнигэр

СВО усулуобуйатыгар сырдык тыына быстыбыт байыаннай дьайыы кыттыылааҕын, дойду гражданинын нэһилиэстибэтин докумуоннатыыны судургутуллубут бэрээдэгинэн быһаарар буолуохтара. Бу – СВО-ҕа суох буолбут эбэтэр анал байыаннай дьайыы буола турар сиригэр тыыннара быстыбыт гражданнар дьиэ кэргэттэригэр сыһыаннаах. СВО-ҕа, анал дьайыы буола турар сиригэр суох буолбуттар нэһилиэстибэлэрэ гражданин өлбүтүн туһунан гражданскай турук аактатыгар суруллубут күнүттэн саҕалаан толоруллуон сөп. Өскөтүн бокуонньук чопчу ханнык күҥҥэ-дьылга өлбүтэ биллибэт эбэтэр өлбүтүн туһунан ыспыраапкаҕа суруллубуту кытта 3 ыйтан уһун кэминэн араастаһар буоллаҕына, аактаҕа суруллубут (дата оформления записи) күнэ официальнайынан билиниллэр. Ол аата, өлбүттээх аймахтара бу иннинээҕи курдук 6 ыйы күүтэ сатыыр кыһалҕалара тохтуур. Уустук балаһыанньаҕа нэһилиэстибэ боппуруоһун хайа кыалларынан түргэнник уонна судургутук быһааттаран оҥоттороллорун наадатыгар итинник уларыппыттар.

Кыра дохуоттаахтар Социальнай уурдарыы уонна счет астарыахтарын сөп

Тииһинэн олоруу алын кээмэйиттэн кыра дохуоттаах уонна социальнай өйөбүлүнэн туһанар Арассыыйа олохтоохторо биир сыл болдьоххо, муҥутаан үрдээбитэ  50 тыһ. солк. диэри үптэринэн социальнай уурдарыы диэнинэн туһаныахтарын сөп. Иккис сылыгар гражданин судаарыстыбаттан социальнай көмөтүн салгыы туһана сылдьар буоллаҕына, уурдарыы болдьоҕо уһатыллар кыахтаах. Счекка хаалбыт суумаҕа ааҕыллар бырыһыан 1 сыл болдьохтоох көннөрү уурдарыыга холоотоххо муҥутуур улахан ыстаапканан ааҕыллар. Ол да иһин буоллаҕа, биир киһиэхэ биир эрэ социальнай уурдарыы көҥүллэнэр. Социальнай уурдарыылаах киһи ааҕыллар бырыһыанын бэйэтэ ыйбыт, туһунан счетугар ыыттарыан сөп.

Социальный счет социальнай уурдарыыга дьүөрэлиир. Ыстаапката Арассыыйа Баана бигэргэппит тутаах (ключевой) ыстаапкатын аҥаарыттан кыччыа суохтаах. Уурдарааччы ааҕыллар бырыһыанын ый аайы устар бырааптаах. Онуоха социальнай счеттары хааччыйыы, атын счекка ыытыы уонна ол счеттан төлөһүү биир ыйга 20 тыһ. солк. иһинэн буоллаҕына, төлөбүрэ суох босхо буолар.

Сымыйа урбаанньыт  уонна холуобунай эппиэтинэс

Подставной сирэй оруолугар ИП быһыытынан регистрацияламмыт физическэй сирэйдэр 100 тыһ. солк. саҕалаан, 300 тыһ. солк. диэри ыстарааптаныахтарын, күһэлэҥ үлэҕэ ананыахтарын биитэр букатын да 3 сылга диэри көҥүллэрэ быһыллыан сөп. Арай подставной сирэй буоларга сөбүлэнэн, маннык буруйу аан бастакытын оҥорбут уонна сэлиэстийэҕэ көмөлөһөр түгэнигэр, сүгүөхтээх буруйуттан быыһаныан сөбө этиллэр.

Инвестордарга сыһыаннаах

Сыаналаах кумааҕы реестирдэрин дьаһайааччылартан кинилэргэ сыаналаах кумааҕытын туттарбыт киһи сылга биирдэ тус счетун туругун уонна туох-ханнык дьайыы оҥоһуллубутун туһунан туох да төлөбүрэ суох ыйыталаһар бырааптаммыт. Реестири тутан олорооччу итинник сибидиэнньэни хайаан да биэриэхтээх. Бу иннинэ төлөбүргэ эрэ ылар кыахтаахтара.

Евроборотокуол лимиитэ уларыйар

Полиция үлэһитин ыҥырбакка эрэ ( саахал кыттыылаахтарын көрүүтэ араастаһар  түгэнигэр) ДТП туһунан докумуону толотторон, ОСАГО-нан төлөтүү муҥутуур улахан лимиитэ 100 тыһ. солкуобайтан 200 тыһ. солк. диэри үрдүүр. Тимир көлө алдьаныыта хаартысканан бигэргэммит түгэнигэр, бу этиллэр лимиит иһинэн кэмпэнсээссийэ көрүллэригэр суоттаныахха сөп.

Маркировкалаах табаар эбиллэр

От ыйын 1 күнүттэн саҕалаан баттахха, бытык хорунарга туттуллар сириэстибэлэргэ, ароматизатордарга уонна дезодараннарга, ону таһынан аска туттуллар тумаларга, кураанах мииннэргэ, специяларга уонна уксууска маркировка киирэр. Бу табаардарга ураты QR-код олохтонор. Ону «Честный знак» сыһыарыыны хачайдаан төлөпүөн камератынан туһаайан, табаар туһунан толору иһитиннэриини, географиятын, айаннаабыт суолун билиэххэ сөп.