От ыйын 1 күнүттэн ипотека бэрээдэгэр уларыйыы киириэҕэ

Дьиэ кэргэн ипотекатын болдьоҕо, ылыллар кэмигэр, 15 сылга диэри кыччыаҕа. Ону тэҥэ, ыалга оҕо ахсааныттан тутулуктаах араас бырыһыан ыстаапката киириэҕэ. Саҥа миэрэлэр от ыйын 1 күнүттэн үлэлииллэр.

Бу уларытыы, оҕолоох дьиэ кэргэттэргэ бааннарга киирбэтэх дохуоттарын толуйарга анаммыт быраабылалар барылларыгар көрүллүбүт. Билигин маннык ипотека сыллааҕыта 6% ыстаапкалаах бэриллэр, оттон ырыынакка дьиэ ыстаапката быдан үрдүк.

Бу араастаһыыны судаарыстыба “ключевая ставка плюс 3,5%” пуормуланан толуйар, билиҥҥи туругунан бу сыллааҕыта 17,75% тэҥнэһэр. Бу сууматтан иэс ылар киһи 6%-нын төлүүр.

Саҥа быраабыланан, толуйуу (компенсация) бааннарга дуогабар түһэрсиллибитин кэннэ 15 эрэ сыл устата бэриллэр. Бу болдьох кэнниттэн судаарыстыба субсидиялааһыны тохтотор. ол кэннэ бааннар иэс ылар дьону ырыынак ыстаапкатыгар көһөрөр эбээһинэстэллэр.

Саҥа тутулла турар дьиэлэргэ кирэдьиит ыстаапката — “ключевая ставка плюс 2%” пуормуланан, оттон чааһынай дьиэ тутуутугар (ИЖС) “ключевая ставка плюс 2,5%” пуормуланан ааҕыллыаҕа.

Маны таһынан, кирэдьиити биэриигэ бааннар дьиэ кэргэҥҥэ оҕо ахсаанын учуоттуохтара. Бу усулуобуйа дуогабар бүтүөр диэри дьайар. Ону бигэргэтэргэ иэс ылар киһи төрөөбүт, иитэ ылбыт туһунан туоһу суруктары эбэтэр суут быһаарыытын көрдөрүөхтээх. Бу дааннайдары килийиэн сөбүлэҥинэн судаарыстыбаннай сыыппара өҥөтүнэн электроннай көрүҥүнэн ылыахха сөп.

Иккис уонна онтон кэлэр оҕо төрөөтөҕүнэ, иитэ ыллахха, кирэдьиит ыстаапката кэлэр төлөбүр кэнниттэн саҕалаан хаттаан ааҕыллыаҕа. Дьиэ кэргэҥҥэ оҕо ахсаана элбэх буоллаҕына, дьиэ кэргэн ипотекатын бырыһыана намтыыр.